Yashyizweho kuri2 January, 2019 | 16:35

Uganda:Ishyaka riri ku butegetsi ryasabye u Burundi kwirinda guteranya Museveni na Perezida Kagame

Ishyaka NRM riri ku butegetsi mu gihugu cya Uganda, ryikomye ubuyobozi bw’u Burundi bubusaba kwirinda gushotora chairman waryo Perezida Yoweri Kaguta Museveni wa Uganda akaba na Chairman wa EAC muri iki gihe ndetse risaba iki gihugu kutamuvanga mu bibazo gifitanye n’u Rwanda.

Ni nyuma y’aho mu mpera z’iki cyumweru gishize, kuwa Gatandatu tariki 29 Ukuboza 2018, mu gihugu cy’u Burundi humvikanye imyigaragambyo yamaganaga ibaruwa Chairman wa NRM, Perezida Yoweri Kaguta Museveni yandikiye Perezida Nkurunziza amusubiza ku kibazo yari yamushikirije.

Abigaragambya bari bitwaje ibyapa bivuga ko “Amagambo atari aya gicuti cyangwa y’ubushotoranyi yavuzwe n’abanyamahanga barwanya ubuyobozi bw’u Burundi”. Bigakomeza bigira biti “aba banyamahanga bakorana n’abanzi b’u Burundi.”

Hari inyandiko igaragara ku rubuga rwa NRM yikoma abayobozi b’u Burundi aho ikomeza ivuga ko iyo myigaragambyo yabaye ikurikira ibaruwa ya Albert Nsekambabaye, umuvugizi w’ishyaka CNDD-FDD yo kuwa Kane, itariki 27 Ukuboza yahamagariye abaturage kujya mu mihanda bakamagana igisubizo Perezida Museveni yahaye Nkurunziza kuwa 08 Ukuboza 2018.

Ishyaka rya NRM rikaba rivuga ko chairman waryo yasubizaga ibaruwa Perezida Nkurunziza yamwandikiye irimo ibintu byo gushinja cyane igerageza gukurura Museveni mu ntambara ikomeye iri hagati ya Perezida Nkurunziza na Perezida Paul Kagame w’u Rwanda.

Iri shyaka rikomeza rivuga ko nka chairman w’Umuryango wa Afurika y’Iburasirazuba, EAC, Perezida Museveni afite uburenganzira bwo kugira icyo avuga ku bibazo by’u Burundi ariko adashobora kwinjizwa mu makimbirane adafite ishingiro nk’uruhande rwa gatatu ahubwo yarushaho gukomeza ibibazo biri mu Burundi.

Bakavuga ko ibibazo biri ku rwego rw’ibihugu kandi bigomba gushakirwa umuti muri urwo rwego hatagize igice cya gatatu kibyinjiramo kuko atari igisubzo.

NRM igakomeza igira iti “Izindi ntambwe mbi ku ruhande rw’u Burundi zizafatwa nk’ubushotoranyi n’icyizere kibi.”

Ikindi ngo niba ubuyobozi bw’u Burundi bwarababajwe no kuba Museveni yarasabye ibiganiro hagati ya leta n’abayirwanya, ngo nta kindi gitekerezo washyira imbere kitari icyo kuko ngo kuganira nibyo biranga ubuyobozi bwa Museveni ndetse ibyo Museveni akaba yarabikoze nk’uko nawe mu nama y’umushyikirano aherutse yagiranye n’abayobozi b’amashyaka atavuga rumwe n’ubutegetsi i Munyonyo mu mujyi wa Kampala.

Kubw’ibyo, ngo “Niba abayobozi b’u Burundi bifuza amahoro yuzuye bakaba badashaka kwicarana n’abatavuga rumwe n’ubutegetsi ari nako batesha agaciro imbaraga inshuti zo mu karere zishyira mu gufasha kugarura ituze rirambye, Ese bazarwana intambara zingana iki?

Kuri ubu ibi bisa n’agatotsi mu mubano hagati ya Uganda n’u Burundi,gatangiye kugaragara mu gihe ibi bihugu byombi byafatwaga nk’inshuti z’akadasohoka ndetse byombi bikaba bikomeje gushyirwa mu majwi n’abayobozi b’u Rwanda babishinja gushyigikira imitwe ishaka guhungabanya umutekano w’u Rwanda irimo FDRL na RNC nk’uko byagarutsweho na Perezida Kagame mu ijambo yagejeje ku banyarwanda rifungura umwaka.

Perezida Kagame yagize ati"Bamwe mu baturanyi bacu bakomeje kugerageza gufasha kuzanzamura imitwe igamije guhungabanya umutekano w’u Rwanda. Nka FDLR, RNC n’abandi. Ibi bibangamira ibikorwa byiza ubundi bisanzwe biranga umuryango wa Afurika y’Iburasirazuba n’umutekano w’aka karere muri rusange.”

Yakomeje agira ati“Imyifatire ya kimwe muri ibyo bihugu ntidutangaza ahubwo dutangazwa n’icyo gihugu kindi aho ibimenyetso dufite nabo bagomba kuba bafite byerekana ko bafatanya ku mugaragaro nubwo babihakana mu ruhame. Iki kibazo turakomeza kukiganira n’abaturanyi bacu mu rwego rw’imikoranire n’imibanire myiza y’ibihugu bya Afurika.”

Yanditswe na Habarurema Djamali


Tanga igitecyerezo

Amazina
Ubutumwa

1 Comment

Natasha - 2 weeks ago

Jye rwose gushwana na Uganda ndabyanga cyane. Ibi bintu bihagarare.

Izindi nkuru