Yashyizweho kuri4 January, 2020 | 17:34

Uganda:Imyitozo yo kujya mu gisirikare yatumye ata ubwenge arasara

Umusore witwa Patrick Olet yatakaje ubwenge arasara ubwo yari mu myitozo y’abashaka kwinjira mu gisirikare cya Uganda nk’uko amakuru aturuka mu gisirikare cya Uganda abivuga.

Umuvugizi w’igisirikare cya Uganda muri Diviziyo ya 4, Maj. Caeser Olweny yavuze ko uyu musore uturuka mu karere ka Agweng yatakaje ubwenge ubwo yari amaze kwiruka ibilometero bitanu.

Nyuma yo kwiruka, Maj. Caeser yavuze ko Olet yatangiye kugira imyitwarire idasanzwe, ajyanwa kwa muganga hamwe n’abandi bagiriye ibibazo bisanzwe mu myitozo.

Ati “Yagerageje amahirwe ye ariko ntiyabashije kugera ku ntambwe ya nyuma. Twamwihutishirije ku bitaro hamwe n’abandi bagize ibibazo kuko twashakaga gutabara ubuzima bwabo.

Tariki ya 27 Ukuboza 2019 ni bwo Uganda yatangije gahunda yo kwakira urubyiruko ruri ku kigero cy’imyaka 18 kugeza kuri 30 rushaka kwinjira mu gisirikare kugira ngo rusimbure abageze mu za bukuru, iki gikorwa kizarangira ku cyumweru tariki ya 5 Mutarama 2020. Urubyiruko 4000 ruzaba rumaze kwinjira mu bemerewe kujya mu gisirikare cy’igihugu nk’uko byashyizwe ahagaragara mu itangazo ry’umuvugizi w’igisirikare cy’igihugu, Brig. Gen. Richard Karemire mu ntangiriro z’Ukuboza 2019.

Gusa ngo ibyo uru rubyiruko ruri gusabwa biri kurugonga harimo no kuba buri wese yujuje amenyo, ubuzemo na rimwe agasubizwa inyuma. Ubwo hari hashize iminsi itatu igikorwa gitangiye, abarenga 2000 bari bamaze kwangirwa bitewe no kutuzuza ibisabwa.

Mu minsi ishize byatangajwe ko Abanyakenya 40 bashatse kwinjiramo, bifashishije ibyangombwa bihimbano bahawe n’ubuyobozi bw’inzego z’ibanze, na bo barangirwa. Ku kibuga cya Akii-bua, mu 2000 baje mu myitozo, abagera kuri 83 ni bo bamaze kwemererwa.

Chief Editor/MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru