Yashyizweho kuri27 October, 2018 | 13:05

Uganda:Abapolisi bahawe amapeti na Kale Kayihura batangiye kuyamburwa

IGP Martin Okoth Ochola umuyobozi wa Polisi ya Uganda, yambuye amapeti bamwe mu bapolisi bayahawe n’uwahoze ari umuyobozi wa Polisi, Gen. Kale Kayihura.

Ubutumwa bwahawe bamwe mu bayobora inzego zigize igipolisi cya Uganda buvuye kwa IGP Ochola buvuga ko yasabye lisiti y’abapolisi bahawe amapeti na Gen. Kayihura.

Spyreports mu nkuru yayo ngo abagizweho ingaruka n’icyemezo cya ochola ari abafite amapeti akurikira arimo irya kaporali( Corporal), Serija( Sergeant), Insupekita wungirije wa Polisi (Assistant Inspector of police (AIP) na Insupekita wa Polisi Inspector of police (IP).

Muri iyi nkuru kandi havugwamo ko abenshi muri aba bahuye n’uruvagusenya rwo kwamburwa amapeti ari abo muri inite ya 145 yatorejwe muri Butiaba mu 2014 ku bufatanye n’Abanyekoreya.

Ngo aba barazira ko Kayihura ubwo yasozaga amahugurwa yabo yabahaye amapeti kuva kuri kaporali kugeza kuri Serija ariko ntagire ijambo na rimwe avuga ribemeza ku mugaragaro nk’abahawe aya mapeti.

Umwe mu bantu ba hafi n’igipolisi avuga ko Gen. Kayihura yari yarigize nyambonwa kuko ngo igihe cyose yabaga agiye gusoza amahugurwa y’abapolisi akumva arishimye yahitaga atanga amapeti uko yishakiye.

Yagize ati” Abofisiye benshi bafite amapeti babonye mu buryo bunyuranye n’amategeko bahawe ku buyobozi bwa Gen. Kayihura. Igihe cyose yumvaga yishimye yahitaga atanga amapeti kandi ntavuge ijambo ryemeza ko azamuye abapolisi mu ntera”

Uyu avuga ko Gen. Kayihura atigeze yubahiriza amabwiriza agenga Akanama Ngishwanama ka Polisi ya Uganda (PAC) ku bijyanye no gutanga amapeti.

Ibi ni byo bitumye ASP Awali, AIP Benson Nkolekwa, AIP Arinda, ASP Betty Adongo bakorera muri Komisiyo y’Igihugu y’Amatora bamanurwa bagashyirwa ku ipeti rya AIP na AIP.

IGP Ochola kandi yatanze amabwiriza yo gukora iperereza ku bapolisi bakoraga bayobowe n’undi ushinjwa kugira uruhare mu gushimuta Lt. Joel Mutabazi ,SSP Nixon Agasirwe. Muri aba harimo ASP Kidandi Ayubu, ASP Fred Muhirwe, IP lyada, IP Abel na Sgt. Otuke.

Aba nabo barakekwaho ko bashobora kuba barahabwaga amapeti na Kayihura mu buryo budahwitse.

Niyomugabo Albert/MUHABURA.RW


Tanga igitecyerezo

Amazina
Ubutumwa

1 Comment

cassien habumuremyi - 1 month ago

vvyukuri ugwego nkugwo nugwego rubwirizwa kugengwa namategeko kuko ari nagwo rufasha reta gushira mungiro ayandi mategeko yose urumva reroko ugwego nkugwo nigwo rubwirizwa gufata iyambere mukwubahiriza amategeko.amagrade ahabwa umuntu abikwiye yigenjej neza yayakoreye.NN rero abayahawe batayakwiye ni bayakwe Hama uwayatanze nimba akiriho abihanigwe vyimazeyo

Izindi nkuru