Yashyizweho kuri30 June, 2019 | 12:30

Sudan:Inzego z’umutekano zihuta zagabye igitero ku nyubako y’abatavuga rumwe n’ubutegetsi

Ishyirahamwe ritavuga rumwe n’ubutegetsi bwa Sudani ryatangaje ko abashinzwe umutekano bateye ku biro byaryo bagahagarika ikiganiro n’abanyamakuru mbere y’uko hongera kuba imyigaragambyo yo kwamagana ubutegetsi bwa gisirikare.

Ishyirahamwe ry’abakozi, Sudanese Professionals Association (SPA), rivuga ko ryamaganye iyo myifatire y’idahwitse.

Mu masaha y’umugoroba w’ejo ku wa Gatandatu, ishyirahamwe SPA ryari ryateguye ikiganiro n’abanyamakuru kugira ngo ritangaze ibyerekeye imyigaragambyo yari iteguwe, ikaba ariyo myigaragambyo ya mbere nyuma y’aho igisirikare kirasiye abari mu myigaragambyo kuri tariki ya 3 z’ukwezi kwa Kamena uyu mwaka.

Umuyobozi w’imyigaragambyo, Ahmed al-Rabie, yabwiye ibiro ntaramakuru bya AFP ducyesha iyi nkuru ko ikipe ya gisirikare izwi nka Rapid Support Forces (RSF), ariyo yahagaritse icyo kiganiro.

Yagize ati "Mu gihe twagiraga ngo dutangire ikiganiro n’abanyamakuru, imodoka eshatu za RSF zuzuye abantu bafite intwaro, zaje ku nyubako yacu bahita batubwira ko tudashobora gukora icyo kiganiro".

Avuga ko abari muri iyo nyubako bose bategetswe kuhava vuba na bwangu.

Al-Rabie, we avuga ko iryo ari ihohotera ry’uburenganzira bw’abaturage ribi kurusha ku ngoma ya Omar al-Bashir yakuwe ku butegetsi mu kwezi kwa Mata uyu mwaka.

Igisirikare cyatangaje ko abatavuga rumwe n’ubutegetsi bazobazwa imyigaragambyo ishobora kwaduka cyangwa abahasiga ubuzima muri iyo myigaragambyo.

Gen Mohamed Hamdan Dagalo, azwi ku izina rya Hemeti, uyoboye itsinda rya RSF yihanangirije avuga ko inkozi z’ibibi zishobora kwishyira mu byago, kandi ko hari n’imigambi mibisha yihishe inyuma y’iyo myigaragambyo.

Ibiganiro hagati y’inama ya gisirikare iyoboye igihugu by’agateganyo n’abatavuga rumwe n’ubutegetsi byarahagaze nyuma y’imyigaragambyo yabaye tariki 03 uyu mwaka.

Ishyirahamwe ry’ubumwe bwa Afrika ndetse na minisitiri w’intebe wa Ethiopia bagerageje guhuza izo mpande zombi, ariko kugeza ubu ibiganiro ntibirongera gutangira.

Kuwa Gatanu tariki 28, SPA yatangaje ko babiri mu bakuru b’abatavuga rumwe n’ubutegetsi bafashwe igasaba amahanga ko yotegeka ko barekurwa.

Yanditswe na Habarurema Djamali


Tanga igitecyerezo

Ibitekerezo


Tanga igitekerezo


Izindi nkuru