Yashyizweho kuri3 August, 2019 | 16:46

Sudan:Hari ibyishimo nyuma yo kugabagabana imyanya mu butegetsi hagati y’akanama ka gisirikare n’abasivile

Inama ya gisirikare iyoboye Sudani yumvikanye n’abarwanya ubutegetsi bwayo ku mirongo iha umwanya igihe gishya cya guverinoma y’inzibacuho.

Umuhuza woherejwe n’ubumwe bwa Afurika Mohamed Hassan Lebatt yatangaje ibi mu gitondo cyo kuri uyu wa gatandatu, nubwo atatanze amakuru arambuye.

Sudan imaze igihe mu myivumbagatanyo n’impagarara kuva Perezida Omar al-Bashir yahirikwa ku butegetsi mu kwezi kwa kane.

Ibiganiro biganisha kuri ubu bwumvikane bw’impande zombi byamaze igihe kinini mu gihe habaga ibikorwa by’urugomo n’ubwicanyi.

Ubu bwumvikane bwari butegerejwe cyane bwatumye benshi bishima cyane muri Sudani.

Mu kwezi gushize kwa Nyakanga, impande zombi zasinye amasezerano yo gusangira ubutegetsi, gusa abigaragambya kuva icyo gihe bari bategereje ibirambuye bigize ayo masezerano.

Imyigaragambyo yatangiye mu kwezi kwa 12 umwaka ushize yamagana ubutegetsi bwa Bashir. Igitutu cy’abigaragambya imbere ya miniteri y’ingabo cyamuhiritse ku butegetsi mu kwezi kwa kane.

Abigaragambya ariko barakomeje kuko ubutegetsi bwahise bufatwa n’abasirikare bo ntibabishyigikira.

Inyandiko y’ubwumvikane kandi, irambura ingingo z’ubutegetsi bw’inzibacyuho bw’imyaka itatu zumvikanyweho mu kwezi gushize n’abayobozi ba gisirikare hamwe n’abrwanya ubutegetsi.

Ubu bwumvikane buteganya inama y’ubutegetsi igizwe n’abasiviri batandatu hamwe n’abajenerali batanu.

Uyu munsi, Lebatt yagize ati "Ndatangariza abanyasudani, Abanyafurika n’abatuye isi ko abahagarariye impande zombi zumvikanye byeruye ku nyandiko y’ubutegetsi".

Yavuze ko hari inama tekiniki zizaterana nyuma zikemeza gushyira ku mukono ubu bwumvikane.

Reuters ivuga ko yabonye kopi y’aya masezerano, ivuga ko yanditsemo ko urwego rwa Rapid Support Forces (RSF), rushinjwa kwica abaturage bigaragambya, ruzahita ruyoborwa n’igisirikare naho urwego rw’iperereza ruyoborwe n’inama y’ubutegetsi.

Uko ubutegetsi bw’inzibacyuho buzaba bwubatse

Hari byinshi impande zombi zumvikanyeho, bikubiyemo gusangira ubutegetsi.

Ibyo bigizwe;

.n’igihe cyo gusangira ubutegetsi kizamara amezi 39,

.Hazashyirwaho inama y’ubutegetsi ndetse na guverinoma n’inama ishinga amategeko,

.Umusirikare w’umujenerali azayobora inama y’ubutegetsi amezi 21 ya mbere naho umusiviri ayiyobore amezi 18 akurikiyeho,

.Minisitiri w’intebe uzayobora guverinoma azashyirwaho n’abo ku ruhande rwa gisiviri,

.Minisitiri w’ingabo na minisitiri w’ubutegetsi bw’igihugu azashyirwaho n’abasirikare.

Nyuma y’igihe bitameze neza muri iki gihugu,ubu bwumvikanye bufatwa nk’intsinzi ku bigaragambyaga. Ntabwo bizwi neza niba imyigaragambyo itazongera.

Niyomugabo Albert/MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru