Yashyizweho kuri6 November, 2018 | 15:16

RDC: Ingobo za Kongo zagabweho igitero

Inyeshyamba ebyiri za Maï-Maï zasize ubuzima mu mirwano yo ku wa 4 Ugushyingo 2018, mu gace ka Painda, kari mu bilometero bitanu uvuye mu mujyi wa Beni, ahari ibirindiro bya FARDC.

Nk’uko Umuvugizi wa Operasiyo Sokola 1, Capt. Mak Hazukay abitangaza, ngo izi nyeshyamba zari zifite intwaro za gakondo n’iziturika, zagabye igitero ku kigo cy’ingabo za FARDC ngo zigamije kukigarurira.

Yagize ati “Zari inyeshyamba za Maï-Maï zagerageje kugaba igitero mu gace karimo ibirindiro bikuru by’ingabo zishinzwe guhashya imitwe y’inyeshyamba (Sokola 1) ku bw’ibyago zahise zineshwa vuba

Iki gitero kibaye icya kabiri kigabwa mu gihe cy’amasaha atarenze 72, aho ku wa Gatandatu tariki ya 2 Ugushyingo 2018, izi nyeshyamba zagabye igitero kuri kasho y’i Beni zifungura imfungwa zisaga 30. Bishinjwa Maï-Maï na ADF.

Izindi nyeshyamba zitazwi zagabye igitero mu gace ka Utchukpa na Muvaramu, turi hafi y’ikiyaga cya Albert muri Teritwari ya Djugu (Ituri). Imirwano yatangiye ku Cyumweru, ikomeza ku wa Mbere tariki ya 5 Ugushyingo 2018.

Radiyo Okapi itangaza ko iyi mirwano yaguyemo abasirikare ba FARDC barindwi n’abasivile benshi bataramenyekana umubare.

Umuvugizi w’igisirikare cya Congo (FARDC) mu Ntara ya Ituri, Lt Jules Ngongo aremeza iby’ibitero bikomeje kugabwa muri Ituri kuva mu cyumweru gishize, ibigo bitatu bya gisirikare bikaba bimaze kugabwaho ibitero. Agashimangira ko ingabo za Leta zikomeje urugamba rwo guhangana n’iyo mitwe yitwaje intwaro itaramenyekana.

Iyi mibare y’abaguye mu ntambara itangajwe mu gihe mu mpera z’icyumweru gishize hari hatangajwe abantu 16 basize ubuzima muri izi ntambara FARDC irimo kurwanamo n’imitwe y’inyeshyamba zitandukanye.

Mu gihe imirwano ikomeje gukaza umurego mu bice bitandukanye bya Congo, haburaga iminsi ibarirwa ku ntoki ngo hakorwe amatora y’umukuru w’igihugu azaba mu Ukuboza 2018.

JPEG - 137.3 kb
Abasirikare ba FRDC KURUGAMBA

Chief editor/Muhabura.rw


Tanga igitecyerezo

Amazina
Ubutumwa

Izindi nkuru