Yashyizweho kuri9 November, 2016 | 13:06

Perezida Vladmir Putin w’Uburusiya yoherereje Trump ubutumwa bw’ishimwe

Donald Trump abaye Perezida wa 45 wa Leta Zunze Ubumwe za Amerika asimbuye Barack Obama wasoje manda ye ya kabiri ari ku butegetsi

Perezida Vladmir Putin w’Uburusiya yoherereje Trump ubutumwa bw’ishimwe, uhagarariye Ubufaransa muri USA ati “isi itembagaye tureba” naho Pierre Nkurunziza w’i Burundi ati “Intsinzi yawe ni iy’abanyamerika bose.”

Abayobozi banyuranye ku isi bahise bagira icyo bavuga ku ntsinzi ya Donald Trump utarahabwaga amahirwe ku ikubitiro

Uyu mugabo kandi abayobozi benshi ku isi bagiye bagaragaza ko batamushyigikiye kubera ibitekerezo bye bitaarimo dipolomasi na nke, byanumvikanagamo ivangura mu batuye Amerika no kwanga abasilamu.

Perezida Putin we yari yaratangaje mbere ko amushyigikiye, amaze gutsinda uyu munsi yahise amwoherereza telegram y’ishimwe ko yifatanyije nawe mu ntsinzi nk’uko bivugwa na Associated Press.

Putin yatangaje ko yizeye kuzakorana na Trump bakavanaho umwuka mubi uri hagati ya USA n’Uburusiya ubu.

Ursula von der Leyen Minisitiri w’ingabo w’Ubudage unashyigikira cyane Chancellor Angela Merkel, yavuze yanditse ko ibivuye mu matora ari “urucantege rukomeye”. Ndetse yanibajije niba atari iherezo rya ‘Pax Americana’ ikimeze nk’amasezerano y’amahoro yemewe na Washington kuva intambara ya kabiri y’isi irangiye.

Gerard Araud, Ambasaderi w’Ubufaransa muri USA ubu, yanditse ati “isi itembagaye tureba”. Yikomaga cyane Perezida umaze gutorwa. Ubu butumwa yari yashyize kuri Twitter yahise abuvanaho nyuma gato, gusa igitekerezo cye cyari cyabonywe na benshi.

Minisitiri w’ubutabera mu Budage Heiko Maas yanditse kuri Twitter ati “Isi ntabwo irangiye ariko ibintu bigiye kugenda mu bundi buryo busekeje.”

Matteo Renzi Minisitiri w’Intebe w’Ubutaliyani yashyigikiraga rwose Hillary Clinton, gusa uyu munsi yashimiye Donald Trump ku ntsinzi avuga ko yizeye ko imibanire y’ibihugu byabo izakomeza gukomera.

Hitezwe cyane ikintu gikomeye kiri buvugwe n’abayobozi muri Mexique bafite ikiganiro n’abanyamakuru mu masaha aza, cyane ko n’ifaranga ryabo ryitwa Peso ryamaze gutakaza agaciro kubera gutsinda kwa Trump bo ubu bafata nk’umwanzi wabo.

Undi wari witezwe kugira icyo avuga ni Perezida Rodrigo Duterte wa Philippines washimiye Donald Trump ku ntsinzi kandi yizeye kubana neza na USA.

Naho Perezida Pierre Nkurunziza w’u Burundi nawe yashimiye Trump ku ntsinzi anagira ati “Intsinzi yawe ni intsinzi y’abanyamerika bose.”

Nubwo Trump yavuze ko abayobozi ba Africa bamazeho imyaka myinshi azahangana nabo, Perezida Yoweri Museveni wa Uganda yanditse ubutumwa bw’ishimwe kuri Trump. Ati “nzieyeko nzakorana nawe nk’uko nakoranye n’abamubanjirije”

Donald Trump yavutse tariki ya 14 Nyakanga 1946 i New York muri Leta Zunze Ubumwe za Amerika. Ni umushabitsi akaba n’umunyemari ufite amamiliyari y’amadolari akaba n’umunyapolitiki wo mu ishyaka ry’aba- républicain.

Trump ni umushoramari mu bikorwa bitandukanye birimo sosiyete z’ubucuruzi n’inyubako ndende muri Amerika. Izwi ni nka Trump Tower, iri muri leta ya New York ndetse n’indi afite muri Atlantic City yitwa Trump Taj Mahal.

Yavutse kuri Fred Trump na nyina Elizabeth Trump, abaherwe bo muri Amerika, afite impamyabushobozi ya kaminuza yavanye muri kaminuza yigisha iby’ubucuruzi ya Wharton.

Ibijyanye na politiki yabitangiye mu myaka 1980, aza kuba umukandida uhatanira guhagararira ishyaka ry’aba-républicain mu matora y’ibanze yabaye muri 2016.

Yanditswe na Niyomugabo/Muhabura.rw


Tanga igitecyerezo

Amazina
Ubutumwa

Izindi nkuru