Yashyizweho kuri14 November, 2018 | 22:53

Perezida Kagame yagiriye uruzinduko mu gihugu cya Qatar [REBA AMAFOTO]

Perezida Kagame ku mugoroba wo kuri uyu wa Gatatu yageze i Doha muri Qatar, mu ruzinduko rw’iminsi ibiri, aho azagirana ibiganiro n’Umuyobozi w’Ikirenga w’iki gihugu (Emir), Sheikh Tamim bin Hamad al-Thani.

Aba bayobozi baherukaga kugirana ibiganiro ku wa 24 Nzeri 2018 i New York, ubwo bombi bari bitabiriye Inteko Rusange ya 73 y’Umuryango w’Abibumbye.

Ibi biganiro byibanze ku buryo bwo gusigasira no guteza imbere umubano w’ibihugu byombi mu nzego zitandukanye, by’umwihariko ubukungu, ishoramari n’ubukerarugendo.

Amir wa Qatar kandi yanaganiriye na Perezida Kagame ku bibazo by’akarere no ku rwego mpuzamahanga, n’uruhare Qatar yagira mu gushyigikira umutekano n’ituze mu bihugu bihurira mu Muryango wa Afurika yunze Ubumwe.

U Rwanda na Qatar bisanzwe bifitanye umubano mwiza.

Ubusanzwe Qatar ituwe n’abaturage bagera kuri miliyoni 2.639 (2017), iki gihugu kikaba gifitanye umubano n’u Rwanda cyane cyane ushingiye ku bintu bitandukanye, nk’ubutwazi bw’abantu n’ibintu, kurwanya ibiyobyabwenge,…

Mu mwaka wa 2015, u Rwanda na Quatar byashyize umukono ku masezerano y’ubufatanye mu birebana no kurwanya ibiyobyabwenge.

Aya masezerano yari yahujwe n’inama yigaga ku bibazo biterwa n’ikwirakwizwa ry’ibiyobyabwenge (Qatar International Anti-Drug Forum) yaberaga i Doha mu murwa mukuru w’icyo gihugu.

yashyizweho umukono nyuma y’aho mu mpera z’umwaka wa 2014 na mbere y’aho hagaragaye abacuruza ibiyobyabwenge ndetse bamwe bafatiwe mu Rwanda kandi bahageze baciye ku Kibuga cy’Indege Mpuzamahanga cya Doha muri Qatar bavuye muri Amerika y’Epfo.

Ku wa 4 Gicurasi 2017 u Rwanda na Qatar byashyize umukono ku masezerano, yo gushyiraho imikoranire mu bya dipolomasi.

Ni amasezerano yashyizweho umukono na Ambasaderi w’u Rwanda mu Muryango w’Abibumbye, Valentine Rugwabiza n’uwari ahagarariyeyo Qatar, Alya Ahmed S. Al-Thani.

Aya masezerano akaba yarashimangiraga kurushaho kunoza umubano w’ibihugu byombi, inyandiko iyasobanura ikaba igaragaza ko azongera ibijyanye n’ubuhahirane hagati y’u Rwanda na Qatar.

Si ibi gusa, kuko Sositeyeti y’indege y’iki gihugu ‘Qatar Airways’ yagiranye amasezerano na leta y’u Rwanda yo gukorera mu Rwanda ku bijyanye n’ingendo zo mu kirere.

MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru