Yashyizweho kuri10 June, 2019 | 18:04

Perezida Kagame yageze i Libreville aho aza kugirana ibiganiro na mugenzi we Ali Bongo[REBA AMAFOTO]

Perezida wa Repubulika y’u Rwanda Paul Kagame, kuri uyu wa mbere tariki 10 Kamena 2019 yageze i Libreville, mu murwa mukuru wa Gabon aho biteganyijwe ko agirana ibiganiro na perezida w’icyo gihugu Ali Bongo Ondimba mu ngoro y’umukuru w’icyo gihugu izwi nka Palais de la renovation.

Akigera i Libreville,Perezida Kagame mu kiganiro yagiranye n’itangazamakuru yavuze ko yishimiye gusura iki gihugu, mu rwego rwo guteza imbere umubano w’u Rwanda na Gabon.

Yavuze ko yagiye gusura inshuti ye itari imeze neza mu minsi ishize kandi ko ari umuco w’Abanyafurika gusura umuntu yaba ari mu bihe byiza cyangwa bibi.

Ati “Nishimiye ko agenda yoroherwa, ku buryo yasubukuye imirimo ye yo kuyobora igihugu.Mu muco wa kinyafurika, dusura inshuti iyo ari mu bihe byiza n’igihe ibintu bitameze neza”.

Ku masezerano yo koroshya urujya n’uruza rw’abantu n’ibintu muri Afurika (CFTA),Perezida Kagame yavuze ko hatewe intambwe nini ngo aya masezerano atangire kubahirizwa,aho yemeje ko umubare usabwa ngo aya masezerano atangire wamaze kuzura.

Yavuze kandi ko ibihugu bitarasinya atari uko bitabishaka cyangwa bitabona inyungu z’aya masezerano, ahubwo ko ari ibibazo bifite haba mu bijyanye n’amategeko yabyo cyangwa ibya tekinike.

Ati “Bikeneye kubanza gukemura ibyo ubundi bikifatanya n’abandi”

Ku bijyanye n’umutekano muri Afurika,Perezida Kagame yavuze ko asanga umuti w’ibi bibazo ari ugukorana nk’ibihugu by’Afurika.

Ati “Nta wundi muti uhari wo gukemura iki kibazo utari ugukorana no gukorera hamwe nk’ibihugu bya Afurika”.

Perezida Ali Bongo Ondimba nawe aheruka mu Rwanda tariki 13 Gashyantare umwaka ushize wa 2018. Mu biganiro abakuru b’ibihugu byombi bagiranye, byizanze ku mutekano mu karere ndetse n’ubuhahirane hagati y’ibihugu byombi.

Perezida wa Gabon kandi yari mu Rwanda ubwo Perezida Paul Kagame yarahiriraga kuyobora igihugu Tariki 18 Kanama 2017.

Ni mu gihe kandi Perezida Ali Bongo aherutse gufatwa n’indwara ikomeye izwi nka stroke, yanatumye amara iminsi mu bitaro. Kuri uyu wa gatandatu, ni bwo yavuze ijambo rye rya mbere nyuma yo gukira iyi ndwara yamuhejeje hasi igihe kigera ku mezi atanu.

Muri iryo jambo rye, Perezida Bongo yasabye Minisitiri w’intebe we gushyiraho guverinoma nshya, asaba ko iyo guverinoma yaba ari nto ugereranyije n’iriho ubu.

Ali Bongo Ondimba w’imyaka 60 y’amavuko,yatangiye kuyobora Gabon mu 2009, asimbuye umubyeyi we se Omar Bongo wayoboye kuva mu 1967 kugeza 2009 ubwo yitabaga Imana.

Yanditswe na Habarurema Djamali/MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru