Yashyizweho kuri31 May, 2019 | 14:50

Perezida Kagame yageze i Kinshasa yakirwa na mugenzi we Felix Tshisekedi na Madamu Denise Tshisekedi[REBA AMAFOTO]

Perezida Kagame yageze i Kinshasa muri Repubulika Iharanira Demokarasi ya Congo, yakirwa na Perezida Felix Tshisekedi na Madamu Denize Felix mu ngoro y’umukuru w’igihugu.

Muri uru ruzinduko Perezida Kagame azagiranamo ibiganiro na Perezida Felix Tshisekedi bigakurikirwa no guherekeza mu cyubahiro umubyeyi wahoze ari Minisitiri w’Intebe, Etienne Tshisekedi.

Ku mugoroba wo kuwa Kane nibwo indege izanye umurambo wa Tshisekedi yageze ku kibuga cy’indege cya Kinshasa, yakirwa n’abakomeye bayobowe na Perezida Félix Tshisekedi.

Umubiri wa Etienne Tshisekedi wapfuye kuwa 1 Gashyantare 2017, wari umaze imyaka ibiri mu Bubiligi, aho yapfiriye ku myaka 84.

Ibihumbi by’abayoboke b’ishyaka rye rya UDPS n’abandi bakoranye ngo bamusezereho mu cyubahiro. Bamwe baje kumwakira bitwaje amafoto ariho intero y’uyu mugabo igira iti “Abaturage mbere na mbere”, abandi bakaba bari bambaye imyenda y’umweru isobanura ko yari umuziranenge ku kijyanye na ruswa.

Imihango yo kumuherekeza ikaba irimo misa, imyiyereko n’umuhuro uri bube kuri uyu wa Gatanu muri Stade des Martyrs, yakira abantu ibihumbi 80. Gushyingura bikaba bizaba kuri uyu wa Gatandatu mu Mujyi wa Nsele mu Burasirazuba bwa Kinshasa.

Abakuru b’ibihugu batandatu biteganyijwe ko bazitabira umuhango wo gushyingura barimo; Alpha Condé wa Guinée, Faure Gnassingbe wa Togo, Joao Lourenço wa Angola, Edgar Lungu wa Zambie, Paul Kagame w’u Rwanda, Denis Sassou Nguesso wa Congo-Brazzaville.

Perezida Kagame agiye muri RDC nyuma yuko muri Werurwe mugenzi we Tshisekedi yaje mu Rwanda yitabiriye inama nyafurika y’abayobozi b’ibigo, Africa CEO Forum.

Mu kiganiro gisoza iyi nama bahuriyemo, Perezida Paul Kagame na Felix Tshisekedi biyemeje gukorera hamwe mu kubaka umubano mushya w’u Rwanda na Repubulika Iharanira Demokarasi ya Congo (RDC) no guteza imbere abaturage b’ibihugu byombi.

Perezida Kagame yakomoje ku mubano w’ibihugu byombi nyuma y’amezi abiri Tshisekedi atorewe kuyobora Congo, avuga ko igikenewe ari ukumwizera kubyo yasezeranyije abaturage no kumufasha.

Ati “Tshisekedi ibyo yasezeranyije abaturage be n’abaturage mu karere, tugomba kumwizera. Turamwizeye kandi tuzafatanya turebe aho twagera. Reka tugerageze turebe aho bituganisha.”

Perezida Felix Tshisekedi yavuze ko nta mpamvu y’uko u Rwanda na Congo byaba abanzi biturutse ku bayobozi.

Yavuze ko ibihugu byahoze bibanye kandi bizakomeza kubana uko byagenda kose.

Ati “Twe turi abakozi, turaza tukagenda ariko ibihugu byo bizahora ari ibituranyi. Rero kurwana, kujya mu makimbirane adafite icyo amaze ni uguta igihe ahubwo twakabaye dufatirana icyo gihe twiyubaka. “

Tshisekedi yavuze ko yabonye Kagame ari umuyobozi bafatanya ufite icyerekezo, ashingiye ku iterambere u Rwanda rwagezeho.

Ati “Namubonyemo ubushake bwo kujya mbere nkuko bigaragra dushingiye ku byakozwe aha mu Rwanda. Tumubona nk’umuntu wihebeye iterambere aho kuba amakimbirane adafite icyo amaze.Ni icyo rero nshaka mu bufatanye bwacu.”

Urugendo rwo gushyingura Etienne Tshisekedi mu gihugu cye ntabwo rwari rworoshye kuko abamushyigikiye bakunze gushinja Joseph Kabila wahoze ayobora RDC, kurubangamira. Kuri ubu bakaba babifata nk’intsinzi idasanzwe bagezeho.

Ku munsi wa nyuma kandi wo kugarura umubiri we nawo ntiwari woroshye kuko ababiteguye bari bateganyije gukodesha indege ya Airbus A330 ifite umwanya munini w’isanduku n’abantu 270, biganjemo abo mu ishyaka UDPS.

Gusa ntibyaje gukunda ku mpamvu z’ibibazo by’imyiteguro y’urugendo. Ibi byatumye hakoreshwa indege yihariye ‘private Jet’, yatwaye umurambo n’abantu 10 gusa bo mu muryango wa Tshisekedi, abandi amagana basigara mu Bubiligi. Bikaba bivugwa ko iyi ndege yakodeshejwe na Perezida wa Togo, Faure Gnassingbé.

EtienneTshisekedi wa Mulumba yabaye umunyapolitiki utavuga rumwe na Leta zose zategetse Repubulika Iharanira Demokarasi ya Congo kuva yabona ubwigenge. Abo ku ruhande rwe bavuga ko Joseph Kabila ari we wari waranze ko umurambo we ucyurwa ugashyingurwa mu cyubahiro.

Umuhungu we Félix Tshisekedi, uyobora RDC yategetse ko umubiri wa Se ugarurwa mu gihugu ugashyingurwa mu cyubahiro mu mihango yagombaga gusozwa kuwa Gatandatu.

Chief Editor/MUHABURA.RW


Tanga igitecyerezo

Amazina
Ubutumwa

Izindi nkuru