Yashyizweho kuri27 October, 2018 | 18:26

Nigeria: Abakobwa b’impanga biteguraga gushyingirwa bashimuswe

Abakobwa b’impanga bo mu gihugu cya Nigeria biteguraga gushyingirwa bashimuswe mu mpera y’icyumweru gishize mu leta ya Zamfara iri mu majyaruguru ashyira uburengerazuba bw’iki gihugu.

umuyobozi wungirije wo mu karere ka Zurmi Abubakar Muhammad,yavuze ko aba bakobwa b’impanga ari bo Hassana na Hussaina Bala Dauran, bari mu bantu barindwi bashimutiwe mu mujyi wa Dauran.

Yagize ati"Abantu barindwi, bane b’igitsina-gabo na batatu b’igitsina-gore bashimuswe hagati yo ku wa gatandatu no ku cyumweru [mu cyumweru gishize]".

Yongeraho ati"Abandi bantu babiri - umugabo umwe n’umugore umwe - nabo bashimutiwe mu cyaro cya Birnin Tsaba, mu gihe abandi batatu nabo bashimutiwe mu mujyi wa Moriki, barimo n’umujyanama mu nzego z’ibanze."

Ubwo bombi bashimutwaga, aba bakobwa b’impanga b’imyaka 18 y’amavuko, bari bagiye gusura mubyara wabo ngo bamwereke amakanzu bateganyaga kwambara bombi mu bukwe bwabo bwari kubera icyarimwe, bwari buteganyijwe mu kwezi kwa cumi na kabiri uyu mwaka.

Muhammad yabwiye BBC ducyesha iyi nkuru ko ababashimuse bahamagaye ababyeyi b’aba bakobwa b’impanga babasaba ingurane kugira ngo babone kubarekura.

Leta ya Zamfara - imwe mu zigize Nigeria - imaze igihe yibasirwa n’ibibazo by’umutekano mucye.

Muri uyu mwaka, abantu bagera hafi kuri 400 bamaze kwicwa muri iyi leta, mu gihe hakomeje kwiyongera ibikorwa by’ubujura, ubwicanyi no gushimuta hagambiriwe kwaka ingurane ngo uwashimuswe abone kurekurwa.

Hassana na Hussaina Bala Dauran bashimuswe bagiye gusura mubyara wabo ngo bamwereke amakanzu bateganyaga kwambara bombi mu bukwe bwabo

Yanditswe na Habarurema Djamali


Tanga igitecyerezo

Amazina
Ubutumwa

Izindi nkuru