Yashyizweho kuri11 March, 2019 | 19:11

Naje hano kugira ngo nirebere uko mukora kuko narabishimye cyane kandi nifuza kubyigana- Perezida Kenyatta

Perezida Uhuru Kenyatta wa Kenya mu ruzindiko yagiriye mu Rwanda kuri uyu wa mbere tariki 11 Werurwe 2019 yahuriye na Perezida Kagame mu kigo cya gisirikare cya Gabiro mu karere ka Gatsibo, aboneraho no gusuhuza abitabiriye umwiherero.

Abaye Perezida wa Mbere mu mateka usuye u Rwanda akagira amahirwe yo kwitabira umwiherero w’abayobozi bakuru mu Rwanda mu ruzinduko rutamenyekanye cyane,Perezida Kenyatta yabwiye abitabiriye umwiherero ko umwiherero ari mwiza cyane ndetse yifuza kuwutangiza mu gihugu cye.

Yagize ati “Naje hano kugira ngo nirebere uko mukora. Narabishimye cyane kandi nifuza kubyigana”.

Perezida Kenyatta yagarutse kandi ku buvandimwe n’umubano hagati y’ibihugu byombi avuga ko umeze neza cyane ndetse ko yifuza ko warushaho kumera neza.

Yagize ati “Turi abavandimwe, kandi nk’abayobozi, uruhare rwacu ni ugushaka uburyo warushaho kuba mwiza.”

Perezida Kenyatta yavuze kandi ko hari ibibazo, ariko kuko hari ubushake, nta kabuza ibyo bibazo bigomba gukemuka.

Yagize ati “Ni byo hari ibibazo, ariko ndizera ntashidikanya ko kuko hari ubushake, hakaba hari n’umutima ushaka byanze bikunze tuzabikemura.

Perezida wa Kenya, yashimye kandi intambwe u Rwanda rwateye nyuma y’imyaka 25 rusohotse muri Jenoside yakorewe Abatutsi.

Yagize ati “Dushima cyane uburyo u Rwanda rwabashije kwivana mu bibazo bikomeye rwarimo, ubu rukaba ari kimwe mu bihugu by’ikitegererezo muri Afurika.”

Akomeza agira ati “Mpora mbwira umuvandimwe wanjye ko ndi gukora cyane ngo mbashe kumucaho mu bijyanye no koroshya ubucuruzi maze na we akambwira ati komereza aho".

Kenyatta yavuze kandi ko ikibaraje inshinga ari ukoroshya imigendereranire y’abaturage b’ibihugu byombi, bafatanyije n’u Rwanda kuko nta wabishobora wenyine.

Ati “U Rwanda rwonyine ntirwabishobora, Kenya yonyine ntiyabishobora, ariko dufatanyije, dufite amahirwe y’ubukungu burambye ku bw’abaturage bacu n’ibihugu byacu.”

Yashoje avuga ko yizera kandi ko asengera u Rwanda ngo ruzagire umwaka mwiza wa 2019.

Uruzinduko uyu muyobozi agiriye mu Rwanda,ni nyuma y’uko mu cyumweru gishize, Perezida Kagame umuturanyi wa Kenya ariwe igihugu cya Tanzania, aganira na perezida John Pombe Magufuli ku bibazo bitandukanye harimo n’ibireba akarere.

Ibi kandi bibaye mu gihe hari umwuka ibibazo bikomeye hagati y’u Rwanda na Uganda, uturuka ahanini n’uko Uganda yahisemo gufatanya n’umutwe RNC urwanya u Rwanda, bigatuma Abanyarwanda bari muri Uganda bakomeza guhohoterwa no gukorerwa iyicarubozo kuko batari muri uwo mugambi mubisha.

Yanditswe na Habarurema Djamali


Tanga igitecyerezo

Amazina
Ubutumwa

Izindi nkuru