Yashyizweho kuri23 July, 2019 | 13:01

Ukraine:Umunyarwanda yabaye umunyafurika wa mbere utorewe kuba depite

Mu matora yabaye yo gushaka abajya mu nteko ishingamategeko umutwe w’abadepite mu gihugu cya Ukraine,mu batowe harimo uwitwa Zhan Beleniuk ufite Se ukomoka mu Rwanda witabye Imana uguye ku rugamba.

Mu matora y’Abadepite yabaye mu mpera z’Icyumweru dusoje abaturage batoye abadepite bari basanzwe mu mirimo itandukanye ndetse imwe utakeka ko uwayikoraga yaba umudepite.

Se yari umupilote w’indege za gisirikare akaba yaraguye ku rugamba umuhungu we afite imyaka 11 y’amavuko.

Zhan w’imyaka 28 asanzwe akunzwe cyane muri Ukraine kuko ari we mukinnyi wamamaye cyane mu mukino wo gukirana. Ni umudepite wo mu ishyaka ry’Umukuru w’igihugu Zelensky.

Se wa Zhan Beleniuk yize ibyo gutwara indege muri Kaminuza ya Kiev aba ari naho amenyanira n’umukobwa baje gushakana

Depite Beleniuk yatangiye umukino wo gukirana afite imyaka ikenda. Yatsinze imikino myinshi mu bihugu by’Uburayi ndetse atsindira umudari wa bronze mu mikino Olympique yabereye muri Rio de Jineiro muri Brezil, icyo gihe hari muri 2016.

Avuga ko akunda inkomoko ye yo mu Rwanda no muri Africa muri rusange ariko nanone akemera ko afite n’amaraso ya Ukraine.

Mbere ngo ntiyakundaga Politiki ariko yaje gukangukira ibyayo ubwo Uburusiya bwafataga agace ka Ukraine kitwa Crimea muri 2014.

Mu bandi badepite batowe harimo umuririmbyi w’injyana ya Rock witwa Svytoslav Vakarchuk, Umuganga witwa Yana Zinkevych, impirimbanyi irwanya ruswa Halyana Yanchenko n’abandi.

Bimwe mu bihembo Beleniuk yegukanye

2010: Yegukanye umudari wa feza mu marushanwa y’Isi y’abakiri bato.

2011: Yabaye umukinnyi wa mbere ku mugabane w’i Burayi ndetse anegukana umudari wa Bronze mu irushanwa ry’Isi muri iki cyiciro.

2012: Yegukanye umudari w’Umuringa mu bafite ibiro 84 mu marushanwa y’i Burayi.

2013: Yegukanye umudari w’Umuringa mu irushanwa rya Universiade.

2014: Yatwaye umudari wa zahabu mu bafite ibiro 85 ku mugabane w’i Burayi, anegukana uw’umuringa muri shampiyona y’Isi.

2015: Yatwaye umudari wa feza mu mikino y’i Burayi.

2016: Yatwaye umudari wa zahabu awukuye Las Vegas muri Amerika, no muri Kanama mu mikino Olempike yari yitabiriye bwa mbere yegukanye umudari wa feza.

JPEG - 59.5 kb
Zhan w’imyaka 28 asanzwe akunzwe cyane muri Ukraine akina umukino wo gukirana none birangiye anabaye umudepite

Chief Editor/MUHABURA.RW


Tanga igitecyerezo

Ibitekerezo


Tanga igitekerezo


1 Comment

Pasteur - 4 months ago

Se wa Zhan yitwaga nde ? Yakomokaga mukahe karere k’i Rwanda

Izindi nkuru