Yashyizweho kuri13 December, 2016 | 11:43

Malawi:Agatsiko k’Abanyarwanda Muguteza akavuyo mu rubanza rwa Murekezi ushinjwa Jenoside

Bishop Simama uvugwaho gushyigikira Abanyarwanda bakekwaho Jenoside baba muri Malawi photo internet

Agatsiko k’impunzi z’Abanyarwanda zikekwaho uruhare muri Jenoside ziri muri Malawi kahuriye mu nama mu mujyi wa Lilongwe kagamije kureba uburyo kakwitambika iyoherezwa mu Rwanda rya mugenzi wabo Vincent Munyakazi wafashwe mu cyumweru gishize nawe akekwaho gukora Jenoside yakorewe Abatutsi mu 1994.

Ikinyamakuru Nyasa Times kivuga ko abo Banyarwanda ndetse n’abanyamahanga bake bahuriye ku nzu y’umucuruzi witwa Bintanga, bagafata ingamba zirimo no guteza akaduruvayo mu rukiko kuri uyu wa Kabiri ku ya 13 Ukuboza ubwo Murekezi araba aburanishwa ku koherezwa mu Rwanda.

Umuntu wabashije kuganira n’icyo kinyamakuru yagize ati “Agatsiko k’Abanyarwanda bahungiye muri Malawi kubera uruhare rwabo muri Jenoside bahuriye kwa Bintanga biyemeza guteza akajagari mu rukiko rukuru rwa Lilongwe ku wa kabiri ubwo Murekezi azaba aburanishwa.”

Yongeyeho kandi ko umunyemari akaba n’umuvugabutumwa wamamaye cyane muri icyo gihugu, Bishop Abraham Simama yemeye gutanga ruswa ya miliyoni 50 z’amafaranga akoreshwa muri icyo gihugu kugira ngo urubanza ruburizwemo; n’ibihumbi icumi ku muntu wese uza guteza umuvundo mu rukiko ashyigikira Murekezi.

Yakomeje agira ati “Bishop Simama yiyemeje gufasha abo Banyarwanda bakekwaho uruhare muri Jenoside, ngo natabigeraho azavana ibikorwa bye by’ubucuruzi muri Malawi asubire muri Tanzania.”

Uwo muntu yanasobanuye ko ifatwa rya Murekezi ryakuye umutima abandi bakekwaho Jenoside bari muri Malawi dore ko ari igihugu gisanzwe kizwiho kubakingira ikibaba; bafite ubwoba ko nyuma ye nabo bazakurikiraho.

Umunyamakuru wa Nyasa Times yagerageje kuvugana na Simama ariko undi amusubizanya umunabi ndetse anamubwira ko azajya mu kaga iyi nkuru niramuka itangajwe.

Bishop Simama ni umunya Tanzania ufite ibikorwa byinshi muri Malawi birimo ihoteri, ibikamyo byinshi byikorera imizigo n’urusengero.

Bivugwa ko uyu munyemari ari nawe wishyuriraga Vincent Murekezi inzu yari atuyemo ubwo polisi yamufataga.

Murekezi ashinjwa kuba yarabonye pasiporo n’ubwenegihugu bwa Malawi mu buryo butemewe n’amategeko. Kuko Pasiporo ebyiri afite zinyuranije amazina ariko zifite ifoto imwe, aho iyo yakuye mu Rwanda yanditsweho Vincent Murekezi, ukomoka mu karere ka Huye, mu gihe iyo yahinduriwe ifite amazina ya Vincent Banda ukomoka muri Tanzania.

Igihugu cya Malawi kivugwaho gucumbikira Abanyarwanda benshi bakekwaho Jenoside, bakinjiyemo banyuze ku mipaka yacyo idacunzwe neza no ku bayobozi na polisi bamunzwe na ruswa.

Ubushinjacyaha bw’u Rwanda bwari bumaze imyaka 8 busaba ko bamwe mu bakoze Jenoside bari muri Malawi bafatwa bakoherezwa kuburanishirizwa mu Rwanda

MUHABURA.RW


Tanga igitecyerezo

Amazina
Ubutumwa

Izindi nkuru

Inkuru zikunzwe