Yashyizweho kuri19 April, 2019 | 20:18

Liberia:Inzoka ebyiri zatumye Perezida Weah yimurira ibiro mu rugo rwe

Perezida wa Liberia, George Weah ubu ari gukorera akazi ke mu rugo nyuma yo gusanga inzoka ebyiri mu nyubako irimo ibiro yakoreragamo.

Amakuru aravuga ko ku wa gatatu w’iki cyumweru ari bwo inzoka ebyiri z’umukara zaturutse mu mwobo uri aho bakirira abantu.

Umunyamabanga wungirije ushinzwe itangazamakuru, Smith Toby yabwiye ibiro ntaramakuru by’Abanyamerika, Associated Press ko Weah azakomeza gukorera mu rugo rwe kugeza ubwo iyi nyubako ababishinzwe bazaba bamaze kuyitunganya.

Ubusanzwe, Weah yakoreraga mu nyubako ya Minisiteri y’Ububanyi n’Amahanga.Birateganywa ko uyu mukuru w’igihugu azayigarukamo ku wa mbere.

Impamvu Weah akorera muri iyi nyubako ya Minisiteri y’Ububanyi n’Amahanga ni uko inyubako igomba gukoreramo umukuru w’igihugu yahiye mu 2006.

Weah yabaye umukinnyi w’umupira w’amaguru ukomeye mu ruhando rw’Isi ku buryo byageze n’aho aba umukinnyi w’umwaka kuri uyu mubumbe mu 1995. Yaje kuba umukuru w’igihugu muri Mutarama, 2018, ubwo yasimburaga Helene Johnson Sirleaf.

Yanditswe na Habarurema Djamali


Tanga igitecyerezo

Ibitekerezo


Tanga igitekerezo


Izindi nkuru