Yashyizweho kuri20 May, 2020 | 19:37

Kumenya Kabuga Félicien neza biratuma umuntu asobanukirwa uburyo umugambi wa Jenoside yakorewe Abatutsi wanogejwe neza ukanaterwa inkunga n’abahezanguni bagera kuri 50

Kabuga yashyiriweho na ICTR impapuro zo kumuta muri yombi mu 1997 ku byaha birindwi birimo icyaha cya Jenoside, ubufatanyacyaha mu cyaha cya Jenoside, gukangurira abantu gukora Jenoside, ubwinjiracyaha bwa Jenoside n’ibindi bifitanye isano na Jenoside yakorewe Abatutsi mu 1994.

Guverinoma ya Leta zunze Ubumwe za Amerika yari yarashyizeho miliyoni 5 z’amadolari ku muntu uzatanga amakuru agafasha mu guta muri yombi buri umwe muri bagera ku icyenda bashakishwa.

Ubushinjacyaha bw’urukiko rw’umuryango w’abibumbye bukurikirana ibyaha uyu munsi bwasabye urukiko ko Kabuga Felisiyani ava mu Bufaransa akoherezwa muri gereza y’uru rukiko rwa ONU.

Kabuga, uregwa ibyaha bya Jenoside, uyu munsi yagejejwe mu rukiko rw’i Paris mu Bufaransa hafi y’aho yafatiwe kugira ngo haburanwe ku kumwimurira ahandi.

Nibwo bwa mbere yari abonetse mu ruhame mu myaka irenga 20 ishize, yari yicaye mu igare ry’abamugaye, yambaye ipantaro ya ’jeans’, umupira wo kwifubika w’ubururu n’agapfukamunwa.

Kabuga yavuze gusa yemeza ko umwirondoro wasomwe ari uwe nk’uko bivugwa na Reuters.

Serge Brammertz umushinjacyaha w’urwego rwasigaye rurangiza imirimo yasizwe n’urukiko mpuzamahanga rwa Arusha yatangaje ko Kabuga yafashwe bisabwe n’uru rwego bityo ko ari rugomba kumufunga.

Kabuga w’imyaka 84 yafashwe kuwa gatandatu mu gitondo mu nzu ntoya yari acumbitsemo, abatuye hafi aho batangaje ko ari umusaza wabagaho mu ibanga, utavugishaga abantu kandi wari urwaye.

Abunganizi mu mategeko ba Kabuga ejo basohoye itangazo rivuga ko batifuza ko hari ahandi yoherezwa. Biteganyijwe no mu iburanisha rya none bashimangira ibi.

Urukiko rwemeye ubusabe bw’uruhande rw’uregwa ruvuga ko irindi buranisha rizaba tariki 27 z’uku kwezi kwa gatanu.

Kabuga asohoka mu rukiko uyumusi yazamuye akaboko afunze igipfunsi imbere ya benshi mu bo mu muryango we bari imbere y’urukiko.

Félicien Kabuga ashobora koherezwa i La Haye mu Buholandi mbere yo kujyanwa i Arusha muri Tanzania aho ruriya rwego ruburanishiriza imanza z’abakekwaho uruhare muri jenoside mu Rwanda.

Kabuga ashinjwa ibyaha birimo gucura umugambi wa jenoside, yiciwemo Abatutsi basaga 1 000 000 n’Abahutu batari bashyigikiye jenoside.

JPEG - 57.6 kb
Ubushinjacyaha bwasabye ko Félicien Kabuga avanwa mu Bufaransa

Kumenya Kabuga neza biratuma umuntu asobanukirwa uburyo umugambi wa Jenoside yakorewe Abatutsi

Kumenya Kabuga neza biratuma umuntu asobanukirwa uburyo umugambi wa Jenoside yakorewe Abatutsi wanogejwe neza ukanaterwa inkunga n’abahezanguni bagera kuri 50 guhera mu myaka ya 1990.Icyo gihe Kabuga yari umucuruzi ukomeye mu gihugu, uvuga rikijyana mu butegetsi bwa Perezida Juvénal Habyarimana.

Kabuga yari umucuruzi ukomoka i Byumba mu majyaruguru y’igihugu, ibice byakomokagamo ibindi bikomerezwa by’icyo gihe. Ni umutunzi wari utunze hegitari 350 z’icyayi n’uruganda rukora ifu y’ingano.

Yari n’umushoramari wubaka inzu zigezweho i Kigali. Ni we wubatse ku Muhima bwa mbere agace k’ubucuruzi gakomeye mu gihugu, ahashyira inyubako igezweho irimo hoteli y’ibyumba 120, ibiro 80 n’isoko. Yubatse indi nzu nziza i Remera yari ifite na Piscine yabagamo we n’umuryango we w’abana be 11.

Abanyarwanda bavuga ko uhagarikiwe n’ingwe avoma, Kabuga na we ibyo yakoraga byose ingwe yabaga imuri iruhande kuko yari yarahanye nayo igihango gikomeye.

Uyu munyemari yari yariyegereje benshi mu bantu bari bakomeye mu gihugu ahereye mu miryango yabo. Abakobwa be babiri bari barashyingiranywe n’abahungu ba Perezida Habyarimana. Abandi bakwe be babiri bari abantu bakomeye mu gihugu barimo Augustin Ngirabatware wabaye Minisitiri w’igenamigambi guhera mu 1990 kugeza mu 1994 n’undi witwa Fabien Singaye.

Singaye yari umunyamabanga wa kabiri muri Ambasade y’u Rwanda mu Busuwisi. Yari intasi ya Leta ya Habyarimana ishinzwe gucungira hafi abatutsi batavuga rumwe na Leta babaga hanze bateguraga gutahuka mu gihugu cyabo ku ngufu. Ibyo byamubashishaga gukorana bya hafi na Paul Barril wari umuyobozi wa jandarumori (gendarmerie) mu Bufaransa.

JPEG - 118.2 kb
Kabuga asohoka mu rukiko uyumusi yazamuye akaboko afunze igipfunsi imbere ya benshi mu bo mu muryango we bari imbere y’urukiko

Kabuga yakomeje kwiyegereza ya ngwe yari imuhagarikiye ubwo umukobwa we witwa Winnie yarongorwaga n’Umunyamabanga Mukuru w’Interahamwe Eugène Mbarushimana.

Ku gite cye kandi Kabuga yafatwaga nk’umujyanama wihariye wa Perezida Habyarimana mu bijyanye n’imari.

Ibyo bikomerezwa byose by’ingoma byari byibumbiye mu gatsiko kiswe ‘Akazu’ kari kayobowe n’umugore wa Perezida ari we Agathe Kanziga kagizwe n’abasirikare bakuru, abategetsi bakuru, abacuruzi n’abayobozi b’amabanki bake.

Mu kazu niho hagiye hanogerezwa imigambi y’uburyo bwo gutera inkunga intambara yo kurwanya FPR Inkotanyi yari yatangije urugamba rwo kubohora igihugu.

Ni intambara yari ihenze kandi isanduku ya Leta yasaga n’irimo ubusa dore ko byahuriranye n’ubukene igihugu cyari gifite, imanuka ry’ibiciro n’intambara y’ubutita yari iri kurangira ku Isi.

Leta nta mafaranga yari ifite ahubwo yari ku gitutu cyo gushyira mu bikorwa imyanzuro yari yarafatiwe n’Ikigega Mpuzamahanga cy’Imari (IMF) cyari cyemeye kuyiguriza. Mu myaka itatu gusa u Rwanda amadeni ya Leta yari amaze kuva kuri miliyoni 500 z’amadolari ageze kuri miliyari y’amadolari.

Nta yandi mahitamo Habyarimana na Leta ye bari bafite atari ukwemera amabwiriza y’abaterankunga mpuzamahanga n’ibihugu bikomeye yo kwemera amashyaka menshi.

Amafaranga ya IMF yazaga afite inzego agomba kujyamo zihariye. Ibyo byabangamiye Leta kuko yifuzaga ko amafaranga menshi ajya mu gisirikare kurwana intambara. Byatumye Akazu gategura undi mugambi, kagafata ibikoresho cyangwa amafaranga yaje agenewe ibindi kakabijyana mu gisirikare.

Nk’iyo Minisiteri y’ubuzima yabaga yatumije imbagukiragutabara, zahabwaga Minisiteri y’ingabo cyangwa Minisiteri yo gutwara abantu n’ibintu yatumiza imodoka zikajyanwa mu ngabo.

Abaterankunga ba Leta baje kumenya ayo manyanga barasakuza ariko ntibyagira icyo bitanga.

Pierre Galand wahoze ari umusenateri mu Bubiligi avuga ko mu 1992 mu mafaranga Leta yinjizaga ku mwaka, igisirikare cyakoreshaga 51 %.

Akazu kashatse ubundi buryo bwo gutera inkunga no gushakira ibikoresho Interahamwe bayobya imisoro ku byinjiye mu gihugu.

Ubwo Galand yakoraga igenzura kuri konti za Banki Nkuru y’u Rwanda mu 1997, uwahoze ari umuyobozi mukuru ushinzwe gasutamo yamusobanuriye uburyo Akazu kari karashyizeho agira ati “Hari agace gato k’ikibuga cy’indege katakorwaho kari kagenewe gucishwamo ibicuruzwa bitanyujijwe kuri gasutamo”.

Akomeza agira ati “Umuryango wa Habyarimana, ni ukuvuga umugore we na musaza we nibo bari barashyizeho ako gace. Nibo bakaga imisoro ibyo bicuruzwa hanyuma bakabijyana ku isoko gushakisha amafaranga azakoreshwa mu guha ibikoresho Interahamwe.”

JPEG - 56.8 kb
Kabuga, uregwa ibyaha bya Jenoside, iyi niyo nzu yafatiwemo

Abagize Akazu batangiye no kwinjira muri sosiyete z’ubucuruzi bashakisha amafaranga yo gutera inkunga Interahamwe. Leta yagenzuraga bya hafi inzego zikomeye nk’ingufu, gutwara abantu n’ibintu, amabanki n’ibindi. Nta na kimwe cyakorwaga kitazwi n’ishyaka MRND ryari ku butegetsi.

Guhera mu 1992, Kabuga afatanyije n’Akazu batangiye kwinjirira sosiyete za Leta bagamije kunyereza amafaranga ku nyungu zabo bwite. Mu zo bahereyemo hario uruganda rw’ibibiriti rwa Sorwal rwari i Butare.

Tariki 13 Gashyantare 1992, Alphonse Higaniro wahoze ari Minisitiri wo gutwara abantu n’ibintu, akaba umwe mu bagize Akazu yagizwe Umuyobozi Mukuru wa Sorwal. Uyu Higaniro umugore we yari umukobwa w’umuganga bwite wa Perezida Habyarimana.

Higaniro akigera muri Sorwal ibaruramari yararihinduye. Hari igice cy’ibyakorwaga na Sorwal yafashe akajya abiha abacuruzi baranguza bakabitwara bishyuriye kuri sheki zitazigamiwe. Abo bacuruzi barahindukiraga bakaranguza n’abandi bacuruzi badandaza ariko abo bakabiri bo bakishyura amafaranga. Ayo mafaranga avuyemo yarakusanywaga akajya kwifashishwa mu guha imyitozo Interahamwe.

Abo bacuruzi baranguza bahembwaga kwemererwa gushora amafaranga yabo mu bundi bucuruzi bwunguka cyangwa bakemererwa kuguriza abandi amafaranga ku nyungu. Benshi babikiriyemo.

Sorwal kandi yaje guha akazi bamwe mu Nterahamwe ndetse inyubako zayo zakoreshwaga mu myitozo n’imodoka zayo zirimo iyo mu bwoko ba Pajero 4 × 4 na Minibus zifashishwaga mu kubatwara.

Ibigo bigo by’ubucuzi n’inganda nabyo byarifashishijwe mu gutera inkunga Interahamwe. Ibyo birimo nka Cimerwa, Ocir-Thé, Magerwa, Electrogaz na Onatracom zose zashyizwe mu maboko y’abari bashyigikiye Interahamwe. Ni ukuvuga ko bashakishaga uko bafasha uwo mutwe cyangwa bagatanga inkunga y’amafaranga yo kuwufasha.

Benshi muri abo bateye inkunga umugambi wa Jenoside ntibagejejwe mu butabera uretse Alphonse Higaniro, wafatiwe mu Bubiligi mu 1995, akaza gukatirwa igifungo cy’imyaka 20 n’urukiko rw’i Bruxelles mu 2001.

Igice cya mbere cy’inkuru z’uruhererekane ikinyamakuru Le monde kise “ Félicien Kabuga, le grand argentier des massacres” ivuga ko Interahamwe Leta yaje gusanga zidahagije ngo umugambi wa Jenoside ushyirwe mu bikorwa. Hari hakenewe igikoresho kibafasha gukora ubukangurambaga mu baturage.

Soma inkuru bifitanye isano Nyuma ya Kabuga Félicien hatangiye uragamba rwo guhiga Agathe Habyarimana bari bahujwe na Politiki y’Akazu

Ni isomo ryari ryaravuye mu igerageza rya Jenoside ryabereye mu Bugesera mu ijoro ryo kuwa 4 rishyira ku wa 5 Werurwe 1992. Uwo munsi amagana y’abatutsi yishwe n’abaturanyi nyuma y’ubukangurambaga bwari bwakozwe na Radiyo Rwanda.

Nyuma yo kubona akamaro ko kwifashisha radiyo mu bukangurambaga, mu 1993 Perezida Habyarimana yashyigikiye umushinga wo gutangiza radiyo yigenga igomba gukwirakwiza amatwara y’abahezanguni b’abahutu yari amaze kumenyekana nka Hutu Power. Aha niho Félicien Kabuga ku gite cye yagize uruhare rugaragara mu ishingwa ry’iyo radiyo yiswe Radio Télévision Libre des Mille Collines (RTLM).

Habyarimana ni umwe mu bari abanyamigabane bakuru muri uwo mushinga.

Kabuga yatanze amafaranga kugira ngo iyo radiyo itangire ndetse n’abandi benshi mu bari bagize Akazu batera inkunga. Alphonse Higaniro n’umugore we nabo bari barimo.

Kabuga yagiye gushakisha indi nkunga mu muryango Fondation Konrad-Adenauer wari ushamikiye ki ishyaka ryo mu Budage CDU (parti démocrate-chrétien allemande).

Ingengo y’imari yo gutangiza RTLM yakusanyijwe isaga ibihumbi 450 by’amayero. Mu kanya nk’ako guhumbya, iyo radiyo yari imaze kuba ikimenyabose biturutse ku ndirimbo zigezweho yakinaga n’abashyushyarugamba bayo bari intyoza mu gukwirakwiza urwango, bashishikariza kwanga abatutsi.

Kabuga yongeye kwigaragaza mu mugambi wa Jenoside ajya kugura amatoni y’imihoro. Byari mu Ugushyingo 1993, icyo gihe sosiyete ya Kabuga yinjije mu gihugu toni 25 z’imihoro ivuye mu Bushinwa, nyuma muri Werurwe 1994 agura indi mihoro ibihumbi 50. Ubwo Jenoside tariki 7 Mata, Kabuga we ibyabaga ntibyamutunguye.

Yafashe umuryango we harimo n’umugore we (umututsikazi), abahungishiriza muri Ambasade y’Abafaransa, aho abandi bategetsi bakomeye b’icyo gihe bahungishirije imiryango yabo.

JPEG - 28.7 kb
Emmanuel Altit umufaransa uri mu bunganira Kabuga mu rukiko uyu munsi kuwa gatatu

Richard Ruhumuriza / MUHABURA.Rw


Tanga igitecyerezo

Ibitekerezo


Tanga igitekerezo


Izindi nkuru