Yashyizweho kuri18 February, 2019 | 09:55

Inyeshyamba za FDLR zagabye igitero kuri FARDC zica abasirikare babiri bayo zibakase imitwe

Abasirikare babiri mu ngabo za RDC ’FARDC’ bishwe baciwe imitwe n’inyeshyamba bivugwa ko ari iza FDLR ubwo zabagabagaho igitero muri Teritwari ya Masisi,mu gace ka Itabi, muri Kivu y’Amajyaruguru.

Ibi byemejwe mu itangazo ry’ubuyobozi bw’ingabo za RDC aho bavuga ko icyo gitero cyabaye mu byumweru bishize kigahitana abasirikare babo.

Itangazo rigira riti “Ku itariki ya 8 Gashyantare 2019, mu gitero cyatunguranye cya FDLR (FOCA) ku birindiro byacu i Itabi, mu Burasirazuba bwa Kabalakasha, muri Teritwari ya Masisi, abo ba FDLR baciye imitwe abasirikare bacu babiri uw’umwe muri bo barawutwara”.

Actualitecd ducyesha iyi nkuru , yatangaje ko izi nyeshyamba zaba zarakoze ibi nko kwihorera mu gihe ku itariki 4 Gashyantare 2019, igisirikare cya Leta cyari cyatangaje ko kishe inyeshyamba zisaga 50 i Masisi.

Crispin Atama Tabe,Minisitiri w’Ingabo ndetse n’umuyobozi muri Monusco, Leila Zerrougui , batangaje ko inyeshyamba za FDLR zari muri Kivu y’Amajyaruguru zahimutse zerekeza muri Kivu y’Amajyepfo aho ngo ziteguye guhuriza hamwe imbaraga zikagaba ibitero mu Rwanda.

Minisitiri Atama akaba asaba ubufatanye hagati y’abasirikare ba FARDC na Monusco kugira ngo haburizwemo uwo mugambo ngo wo gutera u Rwanda ngo biteguriwe ku butaka bwa Congo.

Niyomugabo Albert/MUHABURA.RW


Tanga igitecyerezo

Ibitekerezo


Tanga igitekerezo


1 Comment

Shekina - 5 months ago

Ahubwo ibi ndumva byaba ntako bisa. twakira wenda akanyaro gasigayeho.abantu barasinze bibagiwe inzira berekezaga.siasa twabwirwaga, yasimbuwe, na pfukama nkuyobore.urugiye kera ruhinyuza intwari.

Izindi nkuru