Yashyizweho kuri20 May, 2020 | 10:24

Imbuga nkoranyambaga mu Burundi zahagaritswe

Mu gihe kuri uyu wa Gatatu Abarundi barenga miliyoni eshanu bazindukiye mu matora y’umukuru w’igihugu, amakuru aturuka muri icyo gihugu avuga ko imbuga nkoranyambaga zahagaritswe.

Kugeza ubu imbuga zahagaritswe mu gihugu zirimo WhatsApp, facebook, Youtube na Twitter.

Ibinyamakuru mu guhugu biravuga ko iki ari ikimenyetso ko ishyaka rya perezida Pierre Nkurunziza, CNDD FDD, rishaka gukora amahanya ku buryo hatagira abantu banenga ibikorwa bibi birimo kuba mu gihugu.

Abakandida barindwi nibo biyamamaza muri aya matora, abahabwa amahirwe cyane ni Evariste Ndayishimiye wo mu ishyaka rya CNDD-FDD na Agathon Rwasa wo muri CNL.

Kugeza ubu Abarundi batuye mu mahanga bo ntibemerewe gutora. Imibare y’ibanze y’ibizava mu matora izatangazwa tariki 25 uku kwezi.

Komisiyo y’amatora mu Burundi, yatangaje ko indorerezi 53 zavuye mu mahanga arizo zagiye kugenzura uko aya matora akorwa.

Izi ndorerezi zavuye mu bihugu birimo Tanzania, Misiri, u Bushinwa, muri Kenya, muri Afurika y’Epfo, Repubulika Iharanira Demokarasi ya Congo, muri Nigeria, mu Burusiya na Komisiyo ya Afurika Yunze Ubumwe no mu Burunsi.

Gusa izi ndorerezi zabujijwe gukoresha telefoni mu gufata amafoto, ndetse ntabwo zemerewe gukoresha Kamera mu gihe ziri imbere mu byumba by’amatora.

Amakuru ava muri iki gihugu avuga ko bamwe mu baturage ba Repubulika Iharanira Demokarasi ya Congo bari batuye mu Burundi, batangiye kuva muri iki gihugu batinya ko hashobora kwaduka imvururu zikurikiye amatora

Denis Fabrice Nsengumuremyi/ MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru