Yashyizweho kuri3 June, 2019 | 09:12

Sudan:Bwa mbere abigaragambya bamishwemo urufaya rw’amasasu

Hari amakuru menshi yemeza ko humvikanye urusaku rw’amasasu ahari hateraniye abigarambya benshi mu murwa mukuru Khartoum.

Umwe mu bari kwigaragambya, witwa Fabia Khalaf yavuze ko bitewe n’urugomo rwakorewe abigarambya uyu munsi, ishyirahamwe ry’abakozi (SPA) riyoboye imyigaragambyo muri Sudani ryabasabye gufunga ibiraro n’imihanda.

Khalaf yavuze ko yabonye uburyo abasirikare barashe abigarambya muri iki gitondo abirebeye kuri umwe mu bigaragambya wabinyuzagaho biri kuba kuri rubuga nkoranyambaga rwa Facebook. Avuga ko byatumye na we ahita ajyayo.

Yagize ati "Tugiye gukomeza kugeza inama ya gisirikare ivuyeho. Ngomba kwigaragambya kubera abandi batanze ubuzima bwabo".

Undi mu bigaragambya witwa Mohammed Elmunir yabwiye Al Jazeela ko abasiriakre baje bakarasa buri muntu wari uhari bakizwa n’amaguru.

Ati"Barashe kuri buri muntu mu buryo bw’ako kanya ntanteguza ubwo abantu bahise biruka bakwira imishwaro bakiza amagara yabo.Bafunze imihanda yose ndetse n’amahema yari arimo abantu bayamisheho amasasa".

Amakuru ibiro ntaramakuru Reuters bicyesha ababibonye na televiziyo zitangaza ibiganiro mu Cyarabu, yemeza ko abasirikare binjiye mu bigaragambya bakabamishamo amasasu.

Baravuga ko ibi byakozwe mu rwego rwo gutatanya abigaragambya.Gusa hari amashusho ari gushyirwa ku mbuga nkoranyambaga agaragaza imyotsi myinshi ahari hahuriye abigaragambya.

Umwe muri bo yavuze ko bari gutwika amapine kugira ngo bahume amaso abasirikare babateye.

Biravugwa ko umuntu umwe amaze gupfira muri iyi midugararo n’abandi benshi bakomeretse.

Hari amashusho menshi ari gukwirakwizwa y’abakomeretse n’ubwo bitaremezwa neza niba ari ay’ukuri.

Abigaragambya baracyari imbere y’ibiro bikuru bya gisirikare i Khartoum, mu gihe abasirikare bacyumvikana n’abayoboye imyigaragambyo ku bakwiye kuba bagize leta y’inzibacyuho.

Kugeza ubu abasirikare bari baririnze gutatanya abigaragambya kuva igitutu cyabo cyahirika ubutegetsi bwa Omar al-Bashir wari ubumazeho imyaka 30, abasirikare bagafata ubutegetsi kuva ubwo.

Abigaragambya bavuga ko bifuza ko abasirikare barekura ubutegetsi bakabuha abasiviri.

Yanditswe na Habarurema Djamali


Tanga igitecyerezo

Ibitekerezo


Tanga igitekerezo


Izindi nkuru