Yashyizweho kuri19 January, 2020 | 16:53

Gen. Wilson Irategeka wari umuyobozi wa FLN yarasanywe n’ abasirikare 100 bari kumwe

Hari amakuru avuga ko abarwanyi 100 b’umutwe wa FLN urwanya ubutegetsi bw’u Rwanda baguye mu mutego w’umutwe udasanzwe w’igisirikare kidasanzwe cy’ingabo z’igihugu witwa Hibou Tastes Force muri teritwari ya Luindi iherereye mu ntara ya Kivu y’Amajyepfo.

Aya makuru avuga ko aba barwanyi bahanganye na Hibou amasaha agera kuri ane, mu rusaku rw’amasasu y’imbunda ziremereye tariki ya 15 Mutarama 2020 nk’uko byatangajwe n’ibitangazamakuru byo muri Repubulika Iharanira Demukarasi ya Congo.

Uru rugamba ngo rwaguyemo abarwanyi ba FLN bagera kuri 20 harimo na Komanda wabo mukuru, Gen. Wilson Irategeka. Bivugwa ko aba barwanyi uko ari 100 bari mu rugendo bashaka gusanga bagenzi babo bari mu birindiro bya FLN, bimwe biri mu gace ka Lulima muri Fizi, ho muri Kivu y’Amajyepfo.

Aya makuru yavuzwe ariko haba Igisirikare cy’Igihugu, FLN ndetse n’urwego rutagira aho rwegamiye ntibarabyemeza, bityo rero aya makuru ashobora kuba ari ukuri cyangwa se akaba ari igihuha.

Abarwanyi bari mu mitwe irwanya ubutegetsi bw’u Rwanda bakomeje gutakariza ubuzima mu bitero bya Sokola 2, ingabo za Congo zatangije ku mugaragaro tariki ya 30 Ukwakira 2019, abatishwe bagafatwa, bakohererezwa u Rwanda. Abo ni abo mu mitwe ya FLN, FDLR, P5,CNRD na RUD Urunana.

Tariki ya 17 Mutarama 2020 ni bwo Urwego rw’Igihugu rw’Ubugenzacyaha (RIB) rweretse itangamakuru Capt. Herman Nsengimana wari umuvugizi wa FLN, asimbuye Maj. Callixte Sankara uri gukurikiranwa n’ubutabera ndetse na Mutarambirwa Theobald wari ushinzwe kwinjiza urubyiruko muri FLN. Uyu Herman yumvikanye abwira umunyamakuru ko kubwe abona FLN yararangiye bitewe nuko benshi bamaze gupfa, abandi barafatwa basubizwa mu Rwanda.

Muri FLN havuzwe urupfu rwa Gen. Gaseni tariki ya 30 Ukuboza 2019, Col. Muhawenimana Théogène wamenyekanye nka Festus ndetse na Brig. GeN. Shemeki Shaban (Kagabo Patrick) gusa nta ruhande rwizewe rwigeze rutangaza iby’urupfu rwe.

Muhabura.rw


Tanga igitecyerezo

Ibitekerezo


Tanga igitekerezo


Izindi nkuru