Yashyizweho kuri9 April, 2020 | 11:36

COVID-19: Leta y’ U Burundi yakuye abantu 2,261 mu kato bubohereza mu ngo zabo

Minisiteri y’Ubuzima mu Burundi yatangaje ko mu bantu 2,936 bari barashyizwe mu kato bakekwaho coronavirus muri bo 2,261 barekuwe ngo bajye mu ngo zabo nyuma y’ibyumweru bibiri.

Minisiteri y’Ubuzima ivuga ko aba bari barashyizwe mu kato mu bice bitandukanye by’igihugu, harimo abavuye mu bindi bihugu nk’uko amategeko yashyizweho ubu abitegeka.

BBC yatangaje ko iyi Minisiteri idasobanura niba aba bavuye mu kato bose barapimwe Covid-19, gusa ivuga ko nta bimenyetso by’iki cyorezo bagaragaje muri iki gihe bamaze mu kato.

Iyi Minisiteri ivuga ko abantu 34 bapimwe, bahuye na batatu kugeza ubu babonywemo iyi virus, 21 bapimwe inshuro ebyiri, abandi 13 bamaze gupimwa rimwe, bose ntibanduye iyi virusi.

Leta y’u Burundi yafashe ingingo yo gushyira mu kato iminsi 14 abantu bose bavuye mu mahanga, ibi bishyirwa mu bikorwa cyane mu ntara zihana imbibi n’ibihugu bituranye n’u Burundi.

Ku mbuga nkoranyambaga, bamwe banenga uburyo ibyo gushyira abantu mu kato bikorwa, bavuga ko hari abafunzwe bavanywe mu kato kuko bananiwe kwishyura amafaranga y’aho bari barashyizwe.

Leta y’u Burundi ntacyo iratangaza ku bivugwa.

Minisiteri y’ubuzima ihakana amakuru avugwa ku mbuga nkoranyambaga ko mu Burundi hageze ‘urukingo’ rw’iki cyorezo rugiye kugeragezwa ruvuye mu Bushinwa.

Ikavuga ko “u Burundi butazigera bwemera kuba ahantu ho kugeragereza urukingo n’iyo rwaba urwa Covid-19”.

Abamaze kwandura Covid-19 ku isi ubu bamaze kurenga miliyoni 1,5. Muri bo abarenga 430,000 bari muri USA.

Iyi ndwara ku isi, imaze kwica abantu barenga 88,000 naho abayikize bararenga 330,000 nk’uko bivugwa na kaminuza y’ubushakashatsi ya Johns Hopkins.

Abantu 371 ni bo bamaze kwandura Covid-19 mu bihugu bigize umuryango wa Afurika y’iburasirazuba;

MUHABURA. RW


Tanga igitecyerezo

Ibitekerezo


Tanga igitekerezo


Izindi nkuru