Yashyizweho kuri14 May, 2020 | 09:11

Coronavirus: OMS ivuga ko iyi virus ishobora kuba indi virus nk’izindi zihoraho mu bantu

Ishami ry’umuryango w’abibumbye rishinzwe ubuzima ku isi OMS/WHO rivuga ko coronavirus "ishobora kutazagira aho ijya".

Mu kiganiro n’abanyamakuru ejo kuwa gatatu, Dr Mike Ryan ukuriye ibikorwa by’ubutabazi muri OMS yaburiye abantu kwirinda kwibaza igihe iyi virus izaba yaracitse.

Yavuze ko nubwo urukingo rwayo rwaboneka, gukomeza kuyirwanya bizasaba imbaraga nyinshi.

Abantu hafi 300,000 ubu ku isi bamaze kwicwa n’iki cyorezo naho abarenga miliyoni 4,3 barayanduye.

Hagati aho umuryango w’abibumbye (UN) uvuga ko ki cyorezo kiri guteza indwara zo mu mutwe ahatandukanye ku isi cyane cyane ahatari uburyo buhagije bwo kuvura izi ndwara.

UN isaba za leta gushyira kuvura indwara zo mu mutwe muri gahunda z’ibikorwa byo kurwanya iki cyorezo.

OMS yavuze iki?

Dr Ryan yabwiye abanyamakuru mu kiganiro ku ikoranabuhanga ry’iyakure ko "ari ingenzi gutekereza ko; iyi virus ishobora kuba indi virus ihora mu bantu, ishobora guhoraho".

Ati: "HIV ntaho yagiye - ariko twabashije kubana nayo"

Dr Ryan avuga ko atemera ko "hari umuntu wavuga igihe abona iyi ndwara izacika"

Ubu hari inkingo zigera ku 100 ziri gukorwa z’iyi virus, ariko Dr Ryan avuga ko hari izindi ndwara nk’iseru n’ubu zitacitse nubwo hari inkingo zazo.

Dr Tedros Adhanom Ghebreyesus ukuriye OMS yavuze ko bigishoboka kurwanya iki cyorezo mu gihe abantu bashyizeho umuhate.

Ati: "Ni urugamba rwa buri wese, twese tugomba gutanga umusanzu wacu mu guhagarika iki cyorezo".

Maria van Kerkhove inzobere mu ndwara z’ibyorezo ikorera OMS yabwiye abanyamakuru ko "dukeneye gushyira mu ntekerezo zacu ko bizafata igihe kinini guhashya iki cyorezo".

Ibyo bavuze bije nyuma y’uko ibihugu byinshi byatangiye koroshya ingamba zikakaye zari zarafashwe mu kwirinda iki cyorezo aho abategetsi bari kureba uburyo n’igihe cyo kongera gufungura ibikorwa by’ubukungu.

Dr Tedros yaburiye ko batizeye neza niba gufungura ibikorwa bitazatera inkubiri ya kabiri y’ubwandu bw’iki cyorezo.

Ati: "Ibihugu byinshi birashaka kuva ku ngamba byafashe, ariko inama yacu ni uko buri gihugu cyakomeza kwitegura mu buryo bukomeye bushoboka."

Dr Ryan yongeyeho ati: "Hari ibitekerezo biriho ko gufunga ibintu byose bikora neza cyane n’ibindi ko gufungura ibikorwa bizagenda neza. Byombi ni ibintu bikomeye birimo n’akaga."

Denis Fabrice Nsengumuremyi/ MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru