Yashyizweho kuri20 March, 2020 | 18:59

Coronavirus: “Dufite ikizere ko Imana izaturinda” – Karerwa umuvugizi wa Perezida Nkurunziza

Mu Burundi ubuzima bukomeje nk’uko bisanzwe, umuvugizi w’umukuru w’igihugu Jean Claude Karerwa Ndenzako avuga ko iki gihugu cyahaye Imana umwanya udasanzwe bityo bizeye ko izakomeza kubarinda iki cyorezo, nubwo ngo biteguye kukirwanya kihageze.

Nta murwayi wa Covid-19 uraboneka mu Burundi nk’uko abategetsi babitangaza, kugeza ubu iyi ndwara imaze kugera mu bihugu 33 muri 54 bya Afurika.

Ishami rya UN rishinzwe ubuzima ku isi OMS/WHO rigaragaza muri aka karere u Rwanda, Kenya, DR Congo na Tanzania ariho iyi ndwara imaze kugera, bitatu muri ibi bihugu ni ibituranyi n’u Burundi.

Aho iyi ndwara imaze kugera bahagaritse amashuri, amakoraniro y’abasenga, ingendo nyinshi z’indege, inama zihuza abantu benshi banashishikariza abantu kwirinda guhurira ahari abantu benshi.

Karerwa avuga ko mu Burundi ingamba zafashwe mu kwirinda iyi ndwara zigendanye no kuba iyi virus itarahagera.

Yagize ati: "Izindi zizafatwa mu gihe bizagaragara ko koko icyo kiza kibangamiye igihugu ku rugero ibindi bihugu nk’Ubutaliyano n’Ubushinwa cyangwa ibyo by’Iburayi bigezeho.

"Ingingo ubu zafashwe ni izo kuzitira tutaronerwa, [ariko] uko umuntu yonerwa niko afata izindi ngingo nshyashya".

Mu burundi, ibikorwa bihuza abantu benshi, imyidagaduro, imikino, amateraniro y’abasenga birakomeje nubwo ngo ababijyamo basabwa kwisunga ingingo nko gukaraba intoki, kwirinda kuramukanya, kwirinda kwegerana n’ibindi.

Karerwa ati"Ni ingingo zidasanzwe, abantu nubwo bahura ntibifata nk’uko bari basanzwe, biraboneka ko hari ikintu cyahindutse mu kubaho kw’abantu no mu mahuriro bahuriramo".

Karerwa avuga ko bizeye ko iyi ndwara nubwo yagera mu Burundi bizera ko itageza mu kwezi kwa gatanu ngo ibangamire amatora y’umukuru w’igihugu ateganyijwe tariki 20/05/2020.

Abajijwe niba bidashoboka ko iyi ndwara ishobora kubangamira amatora yagize ati:

"Byabangamira amatora mu gihe cyaba cyabaye ikiza cyakwiye igihugu cyose hafashwe ingingo nka ziriya zifatwa igihugu kiri mu ntambara".

Karerwa avuga ko u Burundi ari igihugu cyahaye Imana umwanya wa mbere, ko bizeye ko iyo Mana izaza ikabarinda ibyago byose.

Ati: "Ibyago byarateye hirya no hino ku isi ariko bigaca inyuma y’u Burundi, n’ubu rero dufite ukwizera ko ubu bwo kuko Imana twayihaye umwanya udasanzwe izaza nayo iturinde ibyo byose mwibaza ko bishobora gushyika".

Gusa avuga ko Imana nayo ngo isaba abantu kuba abanyabwenge ariyo mpamvu nabo biteguye bigendanye n’uko mu gihugu ubu bimeze.

Denis Fabrice Nsengumuremyi/ MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru