Yashyizweho kuri17 April, 2020 | 18:12

Coronavirus: Abanduye muri Tanzania ubu bikubye hafi kabiri mu minsi ibiri

Ministiri w’ubuzima muri Tanzania yatangaje ko habonetse abantu bashya 53 banduye coronavirus mu gihugu, umubare w’abanduye wikubye hafi kabiri ugereranyije n’uko byari byifashe kuwa gatatu, abanduye bose bageze ku 147.

Minisitiri Ummy Mwalimu yatangaje ko abo bantu bose bashya bayisanzemo ari abaturage ba Tanzania.

Iyi ndwara imaze kugera mu tundi duce twa Tanzania tarimo; Kilimanjaro, Mwanza, Lindi na Kagera mu burengerazuba bw’igihugu.

Mu ngamba zo kurwanya ikwirakwira ry’iyi ndwara, Tanzania yafunze amashuri yose, ibuza n’amahuriro manini y’abantu benshi, gusa amasoko, insengero n’ahandi hahurira abantu birakomeje.

Leta ya Tanzania yavuze ko guhagarika ubuzima busanzwe (lockdown) bishobora kugira ingaruka zikomeye ku bantu kurusha coronavirus.

Bamwe mu batavuga rumwe na leta muri Tanzania basabye leta ko yahagarika ubuzima busanzwe nibura mu bice bimwe na bimwe, cyane mu mijyi minini nka Dar es Salaam.

Ejo kuwa kane, Perezida John Pombe Magufuli yasabye abaturage bose b’igihugu gufata iminsi itatu, bahereye uyu munsi kuwa gatanu, basenga basaba Imana kubakiza iki cyorezo.

Yanditse kuri Twitter ati: "…mureke dusenge buri wese mu kwemera kwe, [Imana] izatwumva".

Muri Tanzania, abantu 11 nibo bamaze gukira coronavirus, naho batanu (5) yarabahitanye.

Denis Fabrice Nsengumuremyi /MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru