Yashyizweho kuri17 May, 2018 | 08:44

Burundi: Amtora Nta ndorerezi mpuzamahanga zemerewe ndetse n’ibitangazamakuru

Nta ndorerezi mpuzamahanga zemerewe, ibitangazamakuru mpuzamahanga nka BBC na n’ijwi rya Amerika biherutse gufungwa, hari abemeza ko uyu munsi itora ryo guhindura itegeko nshinga riri bube bucece mu Burundi. Nihatorwa YEGO PerezidaNkurunziza araba afite amahirwe yo kuyobora kugeza mu 2034.

Abaturage babarirwa mu bihumbi magana bahungiye mu mahanga mu 2015 mu gihe cy’amatora y’umukuru w’igihugu yashyize Perezida Nkurunziza kuri manda ya gatatu atemererwaga n’itegeko nshinga, abandi amagana basize ubuzima mu mvururu.

Abatavuga n’ubutegetsi mu Burundi, biganjemo abari hanze yabwo, bavuga ko hari igitugu, ubwicanyi, gufungwa no kumererwa nabi kw’abashaka gutora OYA, bamwe ngo Imbonerakure z’ishyaka CNDD-FDD zababwiye ko bazicwa.

Muri iki cyumweru, umunyamabanga w’ishyaka CNDD-FDD riri ku butegetsi yatangarije i Bujumbura ko abazatora barwanya guhindura itegeko nshinga bazaba ari ‘abanzi b’igihugu’.

Pierre Célestin Ndikumana umudepite uhagarariye Amizero y’Abarundi (ihuriro ry’abarwanya Leta) avuga ko Imbonerakure mu ijoro ryo kuwa kabiri no kuwa gatatu zagiye mu ngo z’abantu zibabwira ko abadatora YEGO bazakurikiranwa cyangwa bakanicwa.

Mu kwezi gushize bwo umwe mu bayobozi muri iri shyaka yavuze ko abazatora barwanya uyu mugambi bazajugunywa muri Tanganyika. Nyuma ariko yaje gukurikiranwa n’ubutabera.

Guverinoma y’u Burundi yo ihakana ibivugwa, ivuga ko itora rya none riri bube mu mahoro n’ubwisanzure.

Minisitiri w’ubutegetsi bw’igihugu Therence Ntahiraja avuga ko ibivugwa na Hon Ndikumana ari ikinyoma.

Itegeko Nshinga nirihindurwa riraha amahirwe Perezida Pierre Nkurunziza ubu wiswe Umuyobozi w’Ikirenga w’ishyaka rye, yo kuyobora izindi manda ebyiri z’imyaka irindwi uhereye mu 2020 aho manda yatorewe 2015 izaba irangiye.
Itegeko Nshinga nirihindurwa riravana manda y’umukuru w’igihugu ku myaka itanu (5) ibe irindwi

Chief editor


Tanga igitecyerezo

Amazina
Ubutumwa

Izindi nkuru