Yashyizweho kuri31 October, 2019 | 13:37

Bugesera:Abakora umwuga wo gutwara abantu ku magare barinubira icyemezo cyo kubakura mu mihanda nimugoroba

Abakora umwuga wo gutwara abantu n’ibintu ku magare mu karere ka Bugesera ntibishimira icyemezo cyafashwe na polisi y’u Rwanda ikorera mu karere ka Bugesera cyo kubakumira gukora akazi kabo mu masaha ya nijoro ivuga ko byateza umutekano muke wo mu muhanda.

Abibumbiye mu mashyirahamwe baganiriye na Muhabura.rw bavuga ko mu gihe cya nimugoroba ariho baba babona abagenzi cyane kuko baba bakubutse mu mirimo n’ahandi berekeza mu ngo zabo bakabona ariho bagakoreye amafaranga atubutse bagatunga imiryango yabo bakiniteza imbere.

Uwitwa Nzeyimana Jean de Dieu ukorera muri imwe muri koperative itwara abagenzi mu karere ka Bugesera avuga ko bafite impungenge z’uwo mwanzuro kuko basanze ari uwo kubasubiza inyuma.

Yagize ati:"Ku manywa usanga abagenzi ari bake ariko wagera nimugoroba ugasanga babaye benshi ku buryo habura nikibatwara , tukaba twasaba ko iki kibazo cyashakirwa umuti kugira ngo dukore akazi kacu nta mpungenge".

Yakomeje avuga ko umwuga wabo ubafatiye runini kuko utunze imiryango yabo kandi ibayeho idasabiriza.

Nyirindekwe Nepomuscene ukorera mu murenge wa Mayange we avuga ko hakabaye uburyo bafashwa kubona amatara amurika ahifuzwa aho kugira ngo bakomanyirizwa gukora nijoro Kandi aribwo babonaga amafaranga.

Yagize ati:"Moto n’imodoka birara bikora ijoro ryose twe bashatse ubundi buryo bwo kubonesha amagare yacu, bagakora amatara azatuma abonesha nijoro maze akazi kacu ntigapfe dore ko tuva mu muhanda kare kandi aribwo twakabonye amafaranga".

Yavuze ko inzego zose zifatanyije icyo atari ikibazo cyananirana dore ko nibikomeye bigenda bikemuka.

Umwe mu bayobozi b’amakoperative atwara abantu ku mugare utashatse ko amazina ye atangazwa yabwiye Muhabura.rw ko abanyamuryango babo babagejejeho icyo kibazo nabo bakigeza ku nzego zitandukanye ariko nta muti uraboneka.

Yagize ati:"Nk’abayobozi baradutumye natwe tubigeza ku zindi nzego ariko nta mwanzuro uraboneka amaso yaheze ku kirere".

Gusa aba banyonzi bavuga ko mu rwego rwo gucyemura icyo kibazo bari basabwe na polisi yo mu muhanda kugura buri wese ijire (Jilet) ifite utugarurarumuri kandi nta wasigaye atayiguze.

Ku ruhande re’ubuyobozi bw’akarere ka Bugesera,umuyobozi w’aka karere Mutabazi Richard yabwiye avuga ko icyo kibazo bakizi kandi bari kugishakira umuti.

Yagize ati:"Turi kubiganiraho n’inzego zitandukanye mu rwego rwo gucyemura icyo kibazo mu buryo burambye biciye mu makoperative y’abanyonzi b’amagare".

Umuvugizi wa polisi y’igihugu mu ntara y’I burasirazuba CIP Hamdun yabwiye Muhabura.rw ko uwo mwanzuro bawufashe kugira ngo babungabunge ubuzima bw’abanyarwanda dore ko amagara aseseka ntayorwe.

Yagize ati:Mu gihe cya nijoro igare ntirigira urumuri rumurika aho uritwaye agana kandi mu muhanda haba hari ibinyabiziga bitandukanye kandi bimurika ahantu harehare ugasanga utwaye igare kubera rwa rumuri ntabone imbere aho ari kujya bityo impanuka ikaba".

Akomeza agira ati"Twe rero nk’urwego rwa polisi twabonye ntahandi gutwara amagare nijoro nta matara afite yaba ari ukwirengagiza agaciro k’ ubuzima ndetse n’uburangare bwatuma impanuka zitwara ubuzima bw’abantu.Ayo magare twarayaciye mu muhanda mu gihe cya nimugoroba igihe hatabona".

Iyo ugeze hafi y’urukiko rw’ibanze rwa Nyamata uhasanga amagare menshi yafashwe na polisi y’u Rwanda kubera kutubahiriza amwe mu mategeko abayakoresha basabwa hakaba havugwa ko ayo yose yafashwe azatezwa cyamunara.

Mu mwaka wa 2016 niho polisi y’igihugu yafashe umwanzuro wo guca amagare mu mujyi wa kigali maze umukuru w’igihugu Nyakubahwa Paul Kagame avuga ko uwo mwanzuro udakwiye ko nabo bakoresha amagare bagomba kubaho kandi batunzwe n’umwuga wabo kuko guca amagare siko guha ba nyirayo amamoto cyangwa amamodoka.Icyo gihe amagare yakomeje gukoreshwa mu mujyi wa Kigali nkuko bisanzwe.

JPEG - 44.2 kb
Aba banyonzi bavuga ko ibyo basabwe byose gukora barabikoze nko kugura amajire ariko bakomeje kunanizwa

Denis Fabrice Nsengumuremyi/MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru