Yashyizweho kuri4 October, 2019 | 19:32

Biravugwa ko umuhanzi akaba n’umwe mu barwanya Leta y’u Rwanda Ben Rutabana yaba yishwe

Nyuma y’amakuru yavugaga ko umuhanzi Rutabana Benjamin uzwi nka Ben Rutabana yaburiwe irengero, inkuru ikomeje gucicikana ni uko ngo yaba yiciwe muri Repubulika Iharanira Demokarasi ya Congo, hafi n’umupaka wa Uganda.

Ben Rutabana abarizwa mu ihuriro rya RNC ritavuga rumwe na Leta y’u Rwanda ndetse akaba yari n’umuyobozi muri iri huriro riyobowe na Kayumba Nyamwasa.

Ikinyamakuru cyo muri Uganda, chimpreports gitangaza ko umuryango we uvuga ko yavuye mu Bubiligi mu kwezi gushize yerekeza mu Burasirazuba bwa Afurika.

Iki kinyamakuru gitangaza ko Rutabana yavuye mu Bubiligi ku wa 4 Nzeri 2019, ahagana saa tatu z’ijoro, ku itariki 5 Nzeri agera ku kibuga cy’indege cya Entebbe muri Uganda saa 13:50, akomereza urugendo rwe muri Repubulika Iharanira Demokarasi ya Congo.

Rutabana ngo yakomeje kujya avugana n’umugore we, Diane Rutabana kuva yava mu rugo kugera ku wa 8 Nzeri. Byari biteganijwe ko Rutabana azasubira i Burayi akagera ku kibuga cy’indege cya Emirates ku wa 19 Nzeri, akagera mu Bubiligi ku wa 20 Nzeri 2019, ariko ntabwo byashobotse.

Haba abo mu muryango we ndetse n’abo muri RNC, ngo bemeza ko Rutabana atigeze ataha mu rugo.

Nyuma y’aya makuru avuga ko yabuze, benshi bakomeje kuvuga ko uyu muhanzi wanabaye umusirikare w’u Rwanda yaba yishwe. Uwitwa Rwirangira ati “Ben Rutabana yarasiwe muri DRC hafi y’umupaka wa Uganda”.

Mukiza Promota abicishije ku rukuta rwe rwa Facebook, na we ati “Umuhanzi akaba n’umunyapolitiki Ben Rutabana ashobora kuba yamaze kwicwa nyuma yo kuburirwa Irengero, amakuru aturuka muri Congo aravuga ko Yaguye mu Minembwe”.

Rutabana Benjamin yavutse mu 1970 mu cyahoze ari Kibuye , ni umuhanzi w’ umunyarwanda. Mu 1990 ubwo Rutabana yari ageze mu mwaka wa nyuma w’ amashuri yisumbuye, yarafashwe maze arafungwa ashinjwa kuba icyitso cya FPR-Inkotanyi, aza kurekurwa muri Werurwe 1991. Bitewe n’ akababaro yatewe n’uko gufungwa yahise yerekeza muri FPR mu Burundi nyuma aza no kujya muri Uganda

Ben Rutabana nyuma y’urugamba rwo kubohora igihugu, mu 1995 nibwo yavuye mu gisirikare afite ipeti rya “Su-Liyetona”. Mu 2004 yerekeje mu gihugu cy’ u Bufaransa mu rwego rwo gukomeza kumenyekanisha umuziki we, agezeyo ngo yiyita impunzi.

Kuri ubu ni we wari ushinzwe urubyiruko rwa RNC mu Bubiligi akaba ari na muramu wa Assinapol Rwigara wahitanywe n’impanuka mu Gashyantare 2015.

MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru