Yashyizweho kuri3 December, 2018 | 14:19

Amashusho agaragaza Angela Merkel ’acura inkota kuri minisitiri w’intebe’ yasecyeje Abanya-Australia

Kuba Scott Morrison ari minisitiri w’intebe wa gatanu Australia igize guhera mu mwaka wa 2013, byashoboka ko yakumva Angela Merkel, umutegetsi mukuru w’Ubudage, wagaragaye asoma vuba umwirondoro we mbere yuko bakorana inama bwa mbere.

Ubwo bombi bicaraga hamwe mu nama y’ibihugu 20 bya mbere mu bukungu ku isi bizwi nka G20, ibyuma bifata amajwi n’amashusho byagaragaje Madamu Merkel asoma igisa nk’urupapuro rw’amabwiriza ajyanye na Morrison.

Urwo rupapuro rwari ruriho n’ifoto ya Bwana Morrison.

Ababireberaga kure byabasecyeje, abo muri Australia bo sinakubwira.

Leta ya Australia yahakanye ko ibyabaye nta soni byateye ibi bihugu byombi.

Kuri uyu wa mbere, Simon Birmingham, minisitiri w’ubucuruzi wa Australia, yagize ati"Itsinda rya Angela Merkel, nta gushidikanya... ryashakaga gusa ko aba afite amakuru yuzuye".

Bwana Birmingham yavuze ko ari ibintu bisanzwe kugira impapuro zikubiyemo umwirondoro uherecyejwe n’ifoto.

Ariko benshi bavuze ko ibyabaye hari ukuntu bikojeje isoni.

Umwe mu bakoresha urubuga nkoranyambaga rwa Twitter uvuga ko yitwa Rhiannon Hoffman, yavuze ko yumva Madamu Merkel, "wacuze inkota" ngo amenye neza minisitiri w’intebe wa Australia. Yavuze ko na we ubwe, nubwo atuye muri Australia, atamuzi na busa.

Umutwe w’inkuru w’ikinyamakuru The Sydney Morning Herald cyo muri Australia ugira uti "Uyu ni nde? Abanya-Australia bashobora kumva akaga Angela Merkel yahuye nako".

Australia yagize ba minisitiri w’intebe batandatu (havuyemo manda ya kabiri ya Kevin Rudd) kuva Madamu Merkel yaba umukuru w’Ubudage mu mwaka wa 2005. Yahuye nibura na batanu muri bo.

Bwana Morrison ni minisitiri w’intebe wa Australia guhera mu kwezi kwa munani uyu mwaka - umwanya yagezeho nyuma yo kwegura kw’uwo yasimbuye Malcolm Turnbull, wegujwe n’abatavuga rumwe na we bo mu ishyaka rye.

Perezida Donald Trump wa Leta Zunze Ubumwe z’Amerika na we yabajije Bwana Morrison kuri izo mpinduka zabaye mu butegetsi bwa Australia.

Yabimubajije ubwo bombi bagiranaga ibiganiro mbere yaho muri iyo nama ya G20 yabereye mu murwa mukuru Buenos Aires wa Argentine.

Scott Morrison na Donald Trump bagiranye ibiganiro ku musozo w’inama ya G20
Bwana Morrison yabwiye abanyamakuru ati "Twanyuze muri macye ku kuntu byagenze".

Byitezwe ko Abanya-Australia bitabira amatora rusange mu mwaka utaha wa 2019, bikaba bishoboka cyane ko azaba mu kwezi kwa gatanu.
Angela Merkel, umukuru w’Ubudage, mu nama na Scott Morrison, minisitiri w’intebe wa Australia, mu nama ya G20 Impapuro Madamu Merkel yasomaga zariho n’ifoto na Bwana Morrison

MUHABURA.RW


Tanga igitecyerezo

Amazina
Ubutumwa

Izindi nkuru