Yashyizweho kuri13 February, 2019 | 13:07

Amafaranga ya VUP agiye kuzajya ahabwa uwo agenewe nta yindi nzira anyuzemo

Umunyamabanga wa Leta muri Minaloc ushinzwe imibereho myiza y’abaturage, Dr Alvera Mukabaramba yavuze ko amafaranga y’abagenerwabikorwa ba VUP azajya agera ku uwo agenewe atagize ahandi anyura.

Ibi byatangajwe kuri uyu wa Kabiri tariki 12 Gashyantare 2019,mu nama yahuje Minaloc, abafite aho bahuriye na gahunda zo gukura abaturage mu bukene ndetse n’abaterankunga,igamije kurebera hamwe uko izi gahunda zihagaze, ibibazo birimo no kubishakira umuti.

Ni mu gihe bamwe mu bagenerwabikorwa ba VUP bakunze kumvikana binubira gutinda kw’amafaranga baba bagomba guhabwa nk’ingoboka cyangwa ayo baba bakoreye binyuze mu mirimo rusange,Umunyamabanga wa Leta muri Minaloc ushinzwe imibereho myiza y’abaturage, Dr Alvera Mukabaramba, yatangaje ko ayo mafaranga azajya ava ku rwego rw’igihugu agera ku bagenerwabikorwa.

Yagize ati “Turimo gushaka kwishyura ku buryo amafaranga azajya ava hano ku rwego rw’igihugu agahita ajya kuri konti y’umuturage cyangwa kuri telefoni ye.”

Dr Mukabaramba yavuze ko iki cyemezo kizatangirana n’ingengo y’imari y’umwaka utaha wa 2019-2020, kuko ngo ubundi byafataga inzira ndende kugira ngo amafaranga agere ku muturage, nyamara yitwa ko ari ayo kumukura mu bukene.

Yagize ati “Ubundi ava hano akanyura ku karere akanyura kuri Sacco, Sacco na yo igashaka uko iyashyira kuri konti.”

Gusa akomeza avuga ko raporo zerekana ko ikibazo cy’icyerererwa ry’amafaranga ya VUP kirimo kugenda gicyemuka kubera ko nko ku mafaranga y’ingoboka byamaze gufata umurongo ku buryo buri kwezi abagenerwabikorwa basigaye bayabona nta mbogamizi.

Yemeza kandi ko ikibazo gisigaye gikomeye ari ku baturage bakora imirimo rusange kuko ngo usanga harimo abandika imibyizi n’intoki bakayijyana ku murenge, na bo bakayijyana ku karere bikinjira muri sisiteme bikabona gusubira mu mabanki.Gusa ngo bagiye kubicyemura.

Ati “Naho turashaka ko byihuta, ukora hariya agahita yinjiza imibyizi muri sisiteme umuntu agahembwa”.

Akomeza avuga ko mu mwaka utaha w’ingengo y’imari, iki kibazo na cyo kizava mu nzira bakajya babona amafaranga yabo ku gihe nyacyo nta zindi nzitizi.

Ku byerekeranye n’ibyiciro by’ubudehe byifashishwa mu gushyirwa ku rutonde rw’inkunga y’ingoboka n’abakora imirimo ya VUP,Mukabaramba yavuze ko ibyiciro by’ubudehe bimara imyaka itatu,bityo aherako yibutsa Abanyarwanda ko igihe kigeze ko ibyiciro by’ubudehe bisubirwamo.

Mukabaramba yasabye inkunga ku banyarwanda yo kuzabigiramo uruhare kuko ngo uburyo bwo kubihindura bwahindutse.Ikindi yabijeje ko hari ikizere kinshi ko amakosa amakosa yagaragaye mu byiciro bya mbere atazongera kugaragara ubundi.

Mukabaramba yasabye Abanyarwanda kuzagira uruhare mu gihe k’ihindurwa ry’ibyiciro by’ubudehe bigiye gusubirwamo.

Yanditsw na Habarurema Djamali/MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru