Yashyizweho kuri3 April, 2020 | 13:59

Abademokarate bagiye gutinza guhitamo umukandida wabo mu matora kubera Covid-19

Byabaye ngombwa ko abademokarate muri Amerika batinza gutora umukandida uzahatana na Donald Trump mu matora ya perezida yo mu kwa 11 kubera Covid-19.

Abakuru b’ishyaka bavuze ko kubera "akaga mu rwego rw’ubuzima katari bwabeho mbere", inama nkuru yo gutora umukandida yigijwe inyuma ho ukwezi ikazaba mu kwa munani.

Joe Biden wahoze ari Visi Perezida w’Amerika ubu ni we uri imbere mu bafite amajwi menshi yo kuba bazahagararira iryo shyaka muri ayo matora.

Ari imbere cyane y’uwo bahatanye umwe gusa usigaye - Bernie Sanders.

Mu byumweru bicye bishize, Bwana Biden n’abandi bakuru mu ishyaka ry’abademokarate bari basabye ko iyo gahunda itinzwa, ubusanzwe ikaba yari gutangira ku ya 13 z’ukwa karindwi.

Abategura iyo nama nkuru y’ishyaka bavuze ko bazakurikiza inama bagirwa n’abategetsi bo mu rwego rw’ubuzima.

Abanyamerika barenga 6000 bamaze kwicwa na Covid-19 - indwara yo mu myanya y’ubuhumekero iterwa n’ubu bwoko bushya bwa coronavirus.

Abarenga 245,000 barayanduye naho abarenga 9000 barayikize muri icyo gihugu, nkuko imibare ya Kaminuza ya Johns Hopkins ibigaragaza kugeza ubu kuri uyu wa gatanu.

Iyo nama nkuru y’ishyaka ry’abademokarate yimuriwe ku itariki ya 17 y’ukwa munani, ikaba iteganyijwe kubera mu mujyi wa Milwaukee muri leta ya Wisconsin.

Iyo leta nta na rimwe yari yarigeze iberamo inama nkuru y’iryo shyaka, ndetse yitezweho kuzaba mu hantu h’isibaniro mu matora, hagati y’abademokarate n’abarepubulikani.

Tom Perez, umukuru w’iyo nama izwi nka ’Democratic National Convention’, yagize ati:

"Ubuzima n’umutekano w’abitabira inama yacu ndetse n’iby’atuye i Milwaukee ni byo byihutirwa cyane kuri twe".

Inama nkuru nk’iyo y’abo mu ishyaka ry’abarepubulikani isanzwe iteganyijwe kuba ku itariki ya 24 y’ukwa munani, ndetse kugeza ubu nta mpinduka zari zatangazwa kuri iyo gahunda.

Uko ibintu bimeze, Perezida Trump ntabwo ahita aba uzahagararira ishyaka rye, kugeza byemerejwe muri iyo nama nkuru y’ishyaka.

Amatora ya perezida w’Amerika azaba ku itariki ya 3 y’ukwezi kwa cumi na kumwe uyu mwaka.

Denis Fabrice Nsengumuremyi /MUHABURA.RW


Tanga igitecyerezo

Ibitekerezo


Tanga igitekerezo


Izindi nkuru