Yashyizweho kuri13 April, 2019 | 18:17

Gasabo:Depite Murumunawabo yasabye abantu bazi aho imibiri iri itarashyingurwa ko bashiruka ubwoba bakaherekana nayo igashyingurwa mu cyubahiro

Depite Cecile Mushikiwabo yasabye abantu batahigwaga muri Jenoside bakaba bazi aho imibiri yaba iri ko bakivanamo ubwoba nk’uko bakomeje babikangurirwa n’inzego zitandukanye nayo igashyingurwa mu cyubahiro.Ni mu gihe hari abarokotse Jenoside yakorewe Abatutsi 1994 batazi aho ababo baguye bakaba batarabonye imibiri yabo ngo bayishyingure mu cyubahiro.

Ibi yabigarutseho mu ijambo yageje ku bitabiriye umuhango wo kwibuka ku nshuro ya 25 Jenoside yakorewe Abatutsi 1994 ku rwego rw’umurenge wa Remera wabereye muri Centre Cristus ahashyinguye imibiri ya bamwe mu bapadiri ndetse n’abakirisitu bahaguye mu gihe cya Jenoside yakorewe Abatutsi.

Depite Cecile Murumunawabo wari umushyitsi mukuru muri uyu muhango yasabye ababyeyi kwirinda kuganiriza abana ku mashyiga bababibamo urwango n’ubugome.

Ati”Ibyo tuganiriza abana ku mashyiga tubyirinde kuko aho u Rwanda rugeze umuntu ukora ibyo bintu n’ubwo ari umwe rwamusize.Ikigaragara ni uko uko twicaye hano ndetse no mu gihugu hose nk’abanyarwanda muri iyi minsi ijana twibuka, uwo muntu tutazamwerera ko akomeza gupfobya Jenoside.

Yasabye kandi abatarahigwaga mu gihe cya Jenoside ariko bakaba bazi aho imibiri y’abishwe muri Jenoside yakorewe Abatutsi aho iri, ko bashiruka ubwoba bakerekana aho iri nk’uko bakomeje babikangurirwa n’inzego zitandukanye.

Ati“Mu bicaye hano harimo abatarahigwaga batazi aho imibiri yaba iri ariko harimo n’abahazi bamwe batanakoze Jenoside ariko bafite impungenge bati ese ni mparanga biragenda bite?

Ati“Mwahawe ibisobanuro CNLG yarigishije,IBUKA yarigishije,u Rwanda rwarigishije ,abayobozi barabibakanguriye babamara ubwoba bababwira byose bababwira uburyo mwabigenza,bababwira uburyo mwajya mushyiraho ibimenyetso,rwose mukagaragaza aho imibiri yaba isigaye ikwiye kugaragara kuko hari ababuze ababo bashaka kubashyingura mu cyubahiro”.

JPEG - 257.3 kb
Umuhango wo Kwibuka wari witabiriwe n’abashyitsi batadukanye barimo Depite Murumunawabo na Hon.Nkusi Jovenal wanabaye umuyobozi wa PAC mu nteko ishingamateko umwaka ushize

Umuyobozi wa IBUKA mu murenge wa Remera Karamba Emmanuel avuga ko bishimira ko nta kibazo cy’amakimbirane kirangwa muri uyu murenge kuko bafite uburere karemano bwababuzaga gukora ikibi.

Ati“Ndashima ko mu murenge wa Remera nta kibazo twigeze tugira cy’amakimbirane n’ivangura,ibyo mbona ko tubicyesha bwa burere bushya n’uburere karemano kuko twebwe twabayeho tubyiruka ntawuzi kwica ibyo aribyo ahubwo urindiriye kwicwa ntakundi nicyo wabaga utegereje”.

Umunyabanga nshingwabikorwa w’umurenge wa Remera Kalisa Jean Sauveur yashimiye abaturage batuye mu murenge ayoboye kuko bagaragaje ubwitabire muri iki gihe cyo kwibuka ku nshuro ya 25 Jenoside yakorewe Abatutsi.

Akomeza agira ati“Ibi byatumye bamenya inkomoko ya Jenoside aho yaturutse kuko si impanuka,si ikintu cyakozwe uwo mwanya, ahubwo ni ikintu cyateguwe gishakirwa ibikoresho bigera ubwo Jenoside igera ku ndunduro. Ubwo rero ayo mateka tubatugomba kuyiga ariko tugamije kugira ngo tunasigasire ibyo tumaze kugeraho ubu ngubu twirinda ikindi cyazaza kikabisenya”.

JPEG - 352.1 kb
Gitifu Kalisa avuga ko amateka ya Jenoside yakorewe Abatutsi aba agomba kwigwa kugira ngo abantu babashe gusigasira ibyo igihugu kimaze kugeraho hanirindwa ikindi kintu cyaza kubisenya

Mu rwego rwo gufasha Abarokotse Jenoside yakorewe Abatutsi 1994,Kalisa avuga ko hari intambwe ikomeye bamaze gutera aho babaha ubufasha burimo nko kubashakira amacumbi n’ibindi bitandukanye.

Ati“Uyu munsi ntabwo ari bensahi dufite bacyeneye amazu kuko imibare igenda igabanuka.Muri uyu mwaka tumaze gutuza imiryango itatu kuko twatuje mu mudugudu w’ikitegererezo wa gikomero,dufite kandi abandi turimo kubakira mu murenge wa Jabana nabo tuzatuza ariko n’abandi badafite ingo zitameze neza tugenda tubasanira cyane cyane bikozwe n’abaturage mu tugari twabo”.

Avuga kandi ko bafite ingamba zitandukanye zo gufasha Abarokotse mu buryo butandukanye nko kubaha inkunga y’ingoboka ibafasha mu buzima bwa buri munsi aho bamaze kuyiha abagera kuri 53.Banatanga kandi n’ubufasha bw’ubuvuzi ndetse n’abanyeshuri barokotse Jenoside barihirirwa amashuri.

Mu rwibutso rwo muri Centre Cristus hashyinguwemo imibiri 17 y’abapadiri ndetse n’abandi bakirisitu bishwe mu gihe bari baje mu mahugurwa.Naho indi mibiri y’abaguye muri uyu murenge ishyinguye mu rwibutso rwa kibagabaga mu murenge wa Kimironko.

JPEG - 265.7 kb
Uru rwibutso rushyinguyemo imibiri 17 y’abapadiri n’abakirisitu bishwe muri Jenoside yakorewe Abatutsi ubwo bari baje mu mahugurwa

Yanditswe na Habarurema Djamali


Tanga igitecyerezo

Ibitekerezo


Tanga igitekerezo


1 Comment

fissa nizeyimana - 4 months ago

ndabakunda cyane nkunda ikinyamakuru cyanyu ndumuhanzi gakondo ndifuza ko twakorana mukunkorera inkuru muburyo bwa promotion murakoze

Izindi nkuru

Inkuru zikunzwe