Yashyizweho kuri30 September, 2019 | 16:01

Urubyiruko rukwiye gusobanurirwa ikibazo k’igurishwa ry’abantu:Gihana Samson

Mu bukangurambaga bugamije kwigisha urubyiruko rwo mu mashuri yisumbuye umuryango Delight Rwanda wagaragaje ko ikibazo cy’igurishwa ry’abantu gikwiye gusobanurirwa urubyiruko kugira ngo barusheho kwirinda abashobora kubashukisha akazi n’ibindi bakajyanwa kugurishwa hanze y’u Rwanda.

Mu bukangurambaga bwakozwe tariki 29 Nzeri 2019 mu kigo cy’amashuri yisumbuye College Marie Reine Rwamagana mu karere ka Rwamagana mu Ntara y’Iburasirazuba abanyeshuri batatu bahagariye abandi bakoze ubukangurambaga bunyuze mu buryo bw’amarushanwa azwi nka ’Children’s Angle Competition Campaign’.

Mu butumwa aba banyeshuri bagejeje kuri bagenzi babo ni uko bakwiye gushishoza ndetse no kwima amatwi umuntu wese waza abizeza ibitangaza bibaganisha kubajyana hanze kumpamvu izo ari zose.

Umunyeshuri witwa Ihirwe Sonia wo muri College Marie Reine Rwamagana yagize ati" Turabizi ko turangiza amashuri yisumbuye dufite inyota y’amafaranga ariko dukwiye gushishoza kugira ngo tutazagwa mu bibazo by’igurishwa ry’abantu rishobora kutuviramo ingaruka zirimo n’urupfu”

Abanyeshuri bari muri ubu bukangurambaga basobanuriwe uko ikibazo cy’igurishwa ry’abantu gihagaze haba mu Rwanda ndetse no mu bindi bihugu byo mukarere k’Afurika y’Iburasirazuba (EAC).

Babwiwe ko n’ubwo iki kibazo mu Rwanda cyafatiwe ingamba, ko nabo bagomba gushyiraho akabo batanga amakuru kunzego z’umutekano mugihe bamenye ahari abantu bashaka kubagurisha.

Mahoro Deborah wiga mu mwaka wa gatanu yabwiye abanyeshuri bagenzi be ko igurishwa ry’abantu ari ikibazo gikomeye kuko iyo bajyanywe hanze bakorerwa ibikorwa by’iyicarubozo nko kubakuramo imwe mu myanya y’umubiri, gukoreshwa imirimo y’agahato, gukoreshwa imirimo y’ubusambanyi bw’agahato, kujyanwa mu bikorwa by’iterabwoba no kubatera ibiyobyabwenge mu mubiri.

Umuyobozi mukuru wa Delight Rwanda, Gihana Samson, yavuze ko gukangurira abana bo mu mashuri yisumbuye uko bakitwara muri iki kibazo gihangayikishije, ari uburyo bwiza bwo kubafasha kumenya uko bakwirinda umuntu wese wabashukisha kubaha akazi hanze Y’uRwanda cyangwa za buruse n’ibindi abagurisha abantu babashukisha.

Yabasobanuriwe kandi amayeri akoreshwa mu bikorwa by’igurishwa ry’abantu ndetse n’ingaruka zigera ku muntu mu gihe yamaze kugurishwa.

Akomeza agira ati “Icuruzwa ry’abantu ni icyaha gikomeye kandi kiri mu bihugu byose ku Isi,kibangamiye uburenganzira bwa muntu.Tuzakomeza gufasha guverinoma y’u Rwanda kugira ngo abakorewe ibi byaha bahabwe ubutabera.”

Urwego rw’Igihugu rw’Ubugenzacyaha RIB, rwatangaje ko mu myaka ishize gucuruza abantu cyane cyane abagore n’abana byabaye ikibazo gikomeye, cyashegeshe cyane umuryango mpuzamahanga.

Ubu bucuruzi ndengamipaka kandi bwugarije buri gace ku Isi, bukaba bwaramaze kwemezwa ku ruhando mpuzamahanga nk’ikibazo gikomereye umutekano wa muntu, uburenganzira bwa muntu ndetse n’ishyirwa mu bikorwa ry’amategeko.

Urwego rw’Ubugenzacyaha (RIB) kandi rwagaragaje ko mu myaka itanu ishize mu Rwanda hagaragaye ibyaha 189 byo gucuruza abantu, byagizwemo uruhare n’abantu 378. Umwaka ushize gusa, ibyaha nk’ibyo byagaragaye ni 49, byarimo abantu 80.

Ubukangurambaga bwa Delight Rwanda bugamije ibikorwa byo gushishikariza urubyiruko rwo mu mashuri yisumbuye kubibazo urubyiruko rukunda guhura nabyo, bwatangiye muri Kamena 2019 bukazasozwa muri Kanama 2020 bugeze mu bigo by’amashuri yisumbuye 125 mu gihugu hose.

JPEG - 192.5 kb
Muri ubu bukangurambaga bwa Delight Rwanda abanyeshuri basobanuriwe uko ikibazo cy’igurishwa ry’abantu gihagaze haba mu Rwanda ndetse no mu bindi bihugu
JPEG - 242.3 kb
Umuyobozi mukuru wa Delight Rwanda, Gihana Samson, asanga umuti w’iki kibazo ari ukwigisha gukangurira abana bo mu mashuri yisumbuye uko bakitwara birinda umuntu wese wabashukisha kubaha akazi hanze y’u Rwanda n’ibindi

JPEG - 192.5 kb
Muri ubu bukangurambaga bwa Delight Rwanda abanyeshuri basobanuriwe uko ikibazo cy’igurishwa ry’abantu gihagaze haba mu Rwanda ndetse no mu bindi bihugu

Chief Editor Muhabura.rw


Tanga igitecyerezo

Ibitekerezo


Tanga igitekerezo


Izindi nkuru

Inkuru zikunzwe