Yashyizweho kuri24 September, 2019 | 13:12

Umujyi wa Kigali: Kubarura abana b’abakobwa batwariye inda iwabo mu ngo bizamara iki !

Umujyi wa Kigali ugiye gutangiza gahunda yo kubarura abana b’abakobwa b’abangavu batwaye inda zidateganyijwe bakabyarira iwabo mu ngo.

Ikigamijwe ni ukugira ngo bakorerwe ubuvugizi bwo kubafasha, n’abatereranywe n’ababyeyi babe babona imiryango yakira abana babyaye.

Ushinzwe Inama y’Igihugu y’Abagore mu Mujyi wa Kigali, Umuhoza Aurore, yavuze ko icyo gikorwa kizakorerwa mu mirenge yose igize Uturere tw’Umujyi wa Kigali uko ari 35, kandi kizarangira bazi umubare w’abana bahuye n’icyo kibazo.

Ati “Turateganya kubitangira muri iki gihembwe gitangiye cya kabiri, kugira ngo tubashe kumenya ngo muri buri murenge dufite abana batwaye inda zidateganyijwe bangahe? Kugira ngo habashe kugira icyakorwa tugomba kumenya n’umubare w’abana ufite.

Hari n’abana ababyeyi babo batakira iyo bamaze gutwara inda, abo rero turashaka kubamenya kugira ngo tubakorere ubuvugizi cyangwa se twegere n’imiryango ibashe kwakira abo bana kuko ni bo Rwanda rw’ejo.”

Yakomeje agira ati “Nta bwo ari ubu gusa tubihisemo, ni igikorwa duhora dukora ariko noneho tukaba tudafite imibare; noneho turashaka kumenya ngo ni iyihe mibare dufite kugira ngo tubashe kugikemura burundu .”

Ku miryango igiha akato umwana w’umukobwa wabyaye inda itateganyijwe, Umuhoza avuga ko ababyeyi bagomba kumenya ko umwana watwaye inda ubuzima bwe butaba burangiye.

Ati “Aba ari umwana ukiri muto, ahubwo dukwiye kumwegera kugira ngo tumenye aho yayobye, aho atamenye ahubwo tukarushaho kumwegera no kumushishikariza, tukamwigisha n’ubuzima bwe bw’imyororokere y’umubiri we.

Ashobora kuba yaratwaye iyo nda kubera kutabimenya, noneho tukarushaho kwigisha uwo mwana, tukamusubiza no mu ishuri kugira ngo azabashe gutera imbere. Nta bwo ubuzima rero buhagarara ahubwo iyo ububungabunze burongera bukazuka bukaba ubuzima bwiza.”

Niyomugabo /Muhabura.rw


Tanga igitecyerezo

Ibitekerezo


Tanga igitekerezo


Izindi nkuru

Inkuru zikunzwe