Yashyizweho kuri4 November, 2019 | 11:43

NYARUGEGE: Icyaha cyo gusambanya abana kimaze kuba icyorezo mu minsi 30 gusa abana 21 barasambanyijwe

Umuyobozi wa Polisi y’Igihugu mu karere ka Nyarugenge SP Sano Nkeramugaba, yagaragaje ko mu minsi 30 y’Ukwakira 2019 abana 21 bo mu karere ka Nyarugenge basambanyijwe, asaba ababyeyi kurushaho gukurikiranira hafi abana babo babarinda iki cyaha cyabaye nk’icyorezo.

Mu ijambo yavugiye ku munsi mpuzamahanga wo kwizigamira, SP Sano yagarutse ku kibazo cy’abana basambanywa bakomeje kwiyongera, agaragaza ko iki kibazo gihangayikishije cyane kandi bigaragara ko hari aho binaterwa n’uburangare bwa bamwe mu babyeyi.

Yagize ati “Icyaha cyo gusambanya abana mu by’ukuri mu karere ka Nyarugenge wagira ngo ni icyorezo noneho, ku bw’umwihariko muri uku kwezi. Uku kwezi rwose kuva tariki ya mbere kugeza iyi tariki tuvugana hamaze gusambanywa abana 21, ni ibintu biteye agahinda.

Mwibaze umwana w’imyaka ibiri n’igice, itatu, ine, itanu, aha ngaha nkabona ko kugira ngo iki cyaha kibe ni ababyeyi baba babigizemo uruhare rukomeye, murumva umwana w’imyaka ibiri n’igice, itatu ntiyakagombye kuba ari mu mugongo wa nyina? Si ko bimeze?”

Yakomeje agira ati “Ubwo se murambwira ko ahurira he n’umugizi wa nabi ujya kumusambanya koko? Harimo uburangare bw’ababyeyi natwe tubyemere ariko twese dufatanye kugira ngo dufate ingamba turebe ko iki kintu cyarangira burundu kuko birababaje”.

Uyu muyobozi wa Polisi mu karere ka Nyarugenge yakomeje agaragaza ko imibereho y’abantu n’imiterere y’aho batuye bituma bakwiye kurushaho kwitwararika.

Ati “Murebe imiterere yacu, no kubaho mu buryo bwo gushugurika n’imiturire yacu ibyo ni byo bituma aba bana basambanywa, ugasanga wenda umugore acuruza agataro, umugabo yirirwa ku gikwa bafite abana batatu b’abakobwa batoya, batuye mu gipangu kirimo amazu nk’umunani, iyo bagiye ku kazi bazindutse abana babasiga aho, nta n’ubushobozi bwo kwishyura umukozi.

Icyo gipangu gituyemo insoresore zinywa urumogi, z’imburamukoro, murumva yuko mu by’ukuri abo bana muba mwabakuyeho amaboko. Ibi rero dufatanye turebe uburyo dushobora kubirwanya turinde abana bacu ihohoterwa”.

Ku rundi ruhande, SP Sano yasabye ababyeyi kujya birinda gusibanganya ibimenyetso mu gihe habayeho icyaha cyo gusambanya umwana, kuko hari aho byagaragaye ko hari aboza abana basambanyijwe, bagasibanganya ibimenyetso batabizi.

Yagize ati “Icyo navuga kuri iki cyaha ni ukubungabunga ibimenyetso, hari igihe umwana usanga yasambanyijwe byagaragaye, igikurikiraho ni ukugana ubutabera, kujya kuri RIB, kujya kuri Polisi, kugira ngo wa mwana afashwe, ahabwe ya miti yatuma atandura za ndwara nzandurira mu mibonano mpuzabitsina bamutabare hakiri kare, kubungabunga ibimenyetso nshaka kuvuga , usanga icyo cyaha kibaye umubyeyi icya mbere akora mbere yo kugana inzego z’ubutabera agafata umwana akamujyana mu bwogero akabanza akamwoza, icyo ni cyo kintu cya mbere bakora.

Ni ukuvuga ngo iyo umwogeje rero tayari uba wasibanganyije ibimenyetso, wamwogeje, niba hari ibimenyetso twakagombye gukura ku mubiri w’uwo mwana twakagombye gupima kugira ngo tubihuze n’uwakoze icyo cyaha, tayari ibyo bimenyetso uba wabisibanganyije. Icyo twababwira ni uko icyo cyaha niba kibaye mutware uko ameze, kugeza igihe ageze imbere ya muganga tumupime tumenye uwakoze icyo cyaha”.

Yunzemo ati “Akenshi bibaho hakabamo gushidikanya kandi iyo bigenze gutyo mu mategeko uregwa abyungukiramo, ukumva ngo runaka yasambanyije umwana none yararekuwe kubera yuko nta bimenyetso bihari, ibimenyetso mwarabisibanganyije, ibyo mugomba kubimenya”.

Chief editor Muhabura.rw


Tanga igitecyerezo

Ibitekerezo


Tanga igitekerezo


Izindi nkuru

Inkuru zikunzwe