Yashyizweho kuri28 March, 2019 | 20:36

Gasabo:Ikibazo cy’abana bakoreshwa imirimo ivunanye giteye inkeke cyahagurukije abashinzwe kubarengera

Ahantu hatandukanye mu karere ka gasabo hakomeje kugaragara abana bakoreshwa imirimo mibi kandi ivunanye igira ingaruka ku mikurire yabo ndetse no kubatesha amashuri.Ku isonga haza imirimo nko kwikorezwa imitwaro mu masoko no mu makaritsiye ndetse no guhondeshwa amabuye avamo kokansi,ibyo byose bifatwa nko kubangamira uburenganzira bwabo.

Iki kibazo cyahagurukije abagize komite y’amadini n’amatorero ku rwego rw’imirenge yose muri aka karere ndetse n’imiryango itegamiye kuri leta yibumbiye muri Coalition Umwana ku Isonga,ari nayo yateguye igikorwa cy’amahugurwa ku bufatanye n’akarere ka Gasabo ku nkunga ya Plan,aho bareberaga hamwe imyanzuro ya Leta ku burenganzira bw’umwana aho igeze,ndetse n’uruhare abanyamadini n’amatorero bagira mu kwita no gukumira iyo mirimo mibi ikoreshwa abana.

Iby’uko muri aka karere hari abana bakoreshwa iyo mirimo,byemezwa n’umuyobozi w’uburinganire n’iterambere ry’umuryango mu karere,Uwamahoro Jeannette Dalia aho avuga ko abana benshi bakunze kugaragara ahantu hatandukanye batwaza abantu imizigo.

At”Abenshi bakora mu ngo bakora akazi k’ububoyi n’ubuyaya abandi ni abatwaza abantu imizigo mu masoko,aho batuye mu makaritsiye cyangwa se abana usanga bagiye gufasha abantu mu birombe by’amatafari bakata icyondo bayabumbamo ndetse no kuyabumba.Hari n’abandi bana umwe umwe ushobora gusanga mu birombe bihonda amabuye avamo konkasi”.

JPEG - 50.4 kb
Uwamahoro avuga ko imirimo ikoreshwa abana ari ikibazo gihangayikishije akarere na Leta muri rusange


Uwamahoro asaba abahagarariye amadini n’amatorere gukora ubuvugizi hirya no hino mu nsengero ngo harebwe ko byacika.

Ati”Twifuzaga rero kugirana ubufatanye n’inzego zitandukanye kugira ngo buri wese aho ari, agire ubukangurambaga ari nako abo mu miryango itegamiye kuri Leta badufasha ndetse n’abandi bafite inkunga yafasha aba bana gusubira mu mashuri buri wese uko ashoboye”.

Uwamahoro kandi asobanura ko iyo abo bana basanzwe muri iyo mirimo bakaba badafite imiryango cyangwa abo bafitanye amasano ya hafi,bashakirwa umuryango ubishaka kandi wiyemeje kubarera w’ababyeyi b’impuhwe bazwi nka ’Malayika murinzi’.

Ibi kandi byashimangiwe n’Umuhuzabikorwa wa Coalition umwana ku isonga Ruzigana Maximilien aho avuga ko icyo bacyeneye ku banyamadini n’amatorero ari ubufatanye mu kurwanya uwo muco wo gukoresha abana imirimo mibi.

Ati”Turifuza ko uwo muco wacika burundu kugira ngo abana basubizwe mu miryango yabo.Icyo ducyeneye ku bayobozi b’amadini n’amatorero ni ukudufasha gukumira icyo kibazo”.

Kuri iki kibazo abatunzwe agatoki ni imwe mu miryango ikize yo mu mujyi wa Kigali ijya mu cyaro ikazana abana bakiri bato bakabeshya ko bagiye kubarera, ariko babageza mu ngo zabo bakabahindura abakozi kandi abana bibyariye bagiye mu mashuri kwiga.

Bityo nk’abayobozi b’amadini n’amatorero ngo bakaba basabwa inkunga n’umusanzu mu gufasha Leta gukumira icyo kibazo dore ko bafite aho bahurira n’abantu benshi kandi bashobora no kubafasha guhindura imyumvire.

JPEG - 68.8 kb
Abahagarariye amadini n’amatorero bari mu matsinda barebera hamwe icyo bakora ngo bahashye ikibazo cy’abana bakoreshwa imirimo mibi kandi ivunanye


Umwe mu bitabiriye aya mahugurwa Pasitori Mutabazi Etienne umushumba wa Paruwasi ya ADEPR bibare avuga ko nk’umupasitori uhagarara imbere y’abantu benshi utanga ivugabutumwa rivura imitima,ko ni vugabutumwa rikiza umubiri riri munshingano ze kuritanga.

Mutabazi yifashishije imwe mu mirongo yo muri bibiriya (Matayo 18;10 ndetse no Kuva 2;9 ) aho yagaragaje ko iyo ukoreye umwana ikibi,hari abamarayika bashinzwe ku murinda.

Ati"Twebwe dufite inshingano yo kubarinda kuko hari n’abamarayika babarinda kandi batanga raporo ku Mana".

Akomeza avuga ko aya mahugurwa yungukiye ibintu bitatu atari azi nk’imyaka igenderwaho mu kugenera umwana umurimo.

Ati”Nungukiyemo kumenya amategeko arengera umwana.kandi aya mategeko ni n’amategeko mpuzamahanga.Nungukiyemo amahame umuntu ashobora kugenderaho kugira ngo abashe guha umwana uburenganzira bwe.

"Ikindi nungukiyemo ni uko namenye ko hari ikigero cy’imyaka runaka aho umwana ahabwa umurimo hakurikijwe ikigero cy’imyaka afite".

Mu kubasha gushyira mu bikorwa ibyo bahuguwe, abayobozi b’amadini n’amatorero bihaye intego yo gushyiraho ihuriro ryabo rizajya ritanga raporo y’ibyagezweho mu gihe runaka bazaba biyemeje.

JPEG - 68.7 kb
Ikibazo cyahagurukije abagize komite y’amadini n’amatorero ku rwego rw’imirenge yose muri Gasabo ndetse n’imiryango itegamiye kuri leta yibumbiye muri Coalition Umwana ku Isonga


Yanditswe na Habarurema Djamali/MUHABURA.RW


Tanga igitecyerezo

Amazina
Ubutumwa

Izindi nkuru

Inkuru zikunzwe