Yashyizweho kuri4 December, 2017 | 08:44

Kagame na madamu bifurije abana iminsi mikuru mihire

Perezida Kagame Paul na Madamu, Jeannette Kagame, bahuye n’abana bahagarariye abandi mu rwego rwo kubifuriza umunsi mukuru wa Noheli ndetse n’umwaka mushya wa 2018.

Ni umuhango wabereye muri Village Urugwiro, aho hari n’abandi bayobozi bakuru bo mu nzego z’Igihugu.

Guhura n’abana mu mpera z’umwaka ni gahunda ngarukamwaka itegurwa na Minisiteri y’Uburinganire n’Iterambere ry’Umuryango, umuryango Imbuto Foundation, Unity Club n’izindi nzego.

Mu butumwa yageneye abana bari bitabiriye uyu muhango, Perezida Kagame yabasabye kwitwara neza, bakagira ikinyabupfura ndetse bagashishikarira kwiga kugira ngo bazabashe kwikorera bagakorera n’Igihugu.

Yavuze ko iyo umwana arezwe neza bimuviramo kuzaba umuntu mukuru muzima ufitiye igihugu akamaro.

Yagize ati “Kubatumira hano rero bihoraho buri mwaka, ni ukugira ngo tubifurize gusoza umwaka neza, tubifurize ubuzima bwiza nk’abana batoya mukura, kandi mukura muganisha ku kubaka igihugu cyacu, ni mwe bayobozi b’ejo n’ejo bundi hazaza. Ariko kugira ngo igihugu kibeho neza kigira abayobozi beza ariko abo bayobozi beza baturuka mu bana batoya uko baba bararezwe.

Uyu muhango wanaranzwe n’indirimbo n’imivugo itandukanye irimo ubutumwa bushishikariza abana kugira ikinyabupfura, aho Umukuru w’Igihugu yabasabye guharanira kugendera kuri ubwo butumwa ndetse bakanagendera ku burere bahabwa n’ababyeyi babo.

Abana bakirwa n’Umukuru w’Igihugu na Madamu, akenshi baba bari mu kigero kiri hagati y’imyaka 6 na 12, aho buri karere ko mu Rwanda kaba gahagarariwe.

Yanditswe na Chief editor/Muhabura.rw


Tanga igitecyerezo

Amazina
Ubutumwa

Izindi nkuru