Yashyizweho kuri13 November, 2019 | 20:19

Abana barasaba Leta ko mu ngengo y’imari ya 2020/2021 yazirikana bagenzi babo baba ku mihanda

Abana batanze ibyifuzo by’uko Leta mu ngengo y’imari y’umwaka utaha wa 2020/2021 yakora uko ishoboye ikazirikana ku buzima bwa bagenzi babo baba ku mihanda kuko akenshi baba bahari atari ku mpamvu zabo ahubwo barabitewe n’ibibazo nk’ubukene cyangwa amakimbirane mu miryango yabo.

Ibi ni bimwe mu byo abana baturutse mu miryango iharanira uburenganzira bwabo ihuriye muri Caolition Umwana ku Isonga bagarutseho ubwo bari bahuye bagatanga ibitekerezo ku byo Leta yazabakorera mu ngengo y’imari y’Umwaka utaha wa 2020/2021.

Umuyobozi w’abana mu karere ka Gasabo waje ahagarariye Cladho,Shyaka Jean Baptiste avuga ko kuba Hari abana baba ku mihanda bitewe n’impamvu zitandukanye zirimo nk’ubukene n’ibindi,Leta yabafasha bakabasha kuhava.

Gusa avuga ko nubwo Leta yakora ibyo yabanza ikamenya neza ibibazo byatumye bahava hanyuma ikabanza kubikemura.

Ati”Hari abo duhura ugasanga Leta iri gushaka kubasubiza mu miryango yabo itabanje kumva icyatumye bavayo ngo kibanze gikemuke bityo icyo gihe babana ntibazagenda ngo bagume mu miryango yabo bazahita basubira mu muhanda”.

Akomeza agira ati”Njye numva bafata abana bakabavana mu mihanda nibyo ariko babanje kumva izo mpamvu zatumye bahava.Naho abadafite imiryango yabo nabo bagashaka uburyo babitaho bagashaka aho bazajya baba bahabonera uburenganzira bwabo busesuye nko kwiga,kwidagadura n’ibindi".

Mu gihe hari abana bakoreshwa mu ngo batarageza ku myaka 18 y’ubukure ariko ugasanga ababakoresha babeshya ko abo bana bujuje imyaka,Ishema Ange Divine, waturutse mu karere ka Kicukiro uhagarariye abana mu muryango w’Abagide avuga ko Leta yashyiraho ingamba zo gukora umukwabu mu ngo bakareba abo bantu uwo basanze amukoresha yaranamubujije kwiga,agahanwa.

Umuyobobozi wa Coalition Umwana ku isonga Sekanyange Jean Leonard avuga ko impamvu batumiye aba bana ari ukugira ngo batange ibitekerezo ku byo bifuza ko Leta yazabakorera bigashyirwa mu ngengo y’imari y’umwaka utaha kuko ari ingenzi ko bagira uruhare n’ijambo mu bibakorerwa.

Ati”Ni byiza ko muri biriya igihugu kibateganyiriza nabo baba babigizemo uruhare bakavuga ngo twifuza ko igihugu cyazadukorera iki…..Ariko n’abana kuko aribo bagenerwabikorwa ni byiza ko baba aba mbere mugutanga ibitekerezo”.

Avuga ko muri ibyo bitekerezo abana batanga biba bigizwe ni ibyo batumwe na bagenzi babo babana muri iyo miryango ndetse n’aho bahurira haba mu nsengero n’ahandi igihe babonye bibangamiye uburenganzira bwabo .

Nyuma Caolition Umwana ku Isonga nka Sosiyete Civile bagakusanya ibyo bitekerezo byabo bigashyikirizwa minisiteri y’imari n’igenamigambi ’MINECOFIN’ kuko ariyo ishinzwe gutegura ingengo y’imari.Nyuma babona hari ibyo itashyizemo mu byo baba bayishyikirije, bagahita babijyana mu nteko ishinga amategeko kuko niyo itora ingengo y’imari.

Iyo mu mbanziriza mushinga bidasohotsemo,babitangaza mu nteko ishingamategeko muri komisiyo y’ingengo y’imari mbere y’uko itorwa bakabasha kureba ibyo MINECOFIN ititayeho hanyuma bagakora ubuvugizi mu nteko ishingamategeko kugira ngo isabe MINECOFIN ibyongeremo.

JPEG - 54.8 kb
Umuyobozi wa Coalition Umwana ku Isonga ,Sekanyange Jean Leonard, yakira bana bari baje guhuriza hamwe ibyifuzo by’ibyo bashaka ko bizabakorerwa
JPEG - 47 kb
Abana bagiye mu matsinda bandika ibitekerezo by’ibyo basabye Leta ko yazibandaho mu ngengo y’imari y’umwaka utaha
JPEG - 578.2 kb
Ifoto y’urwibutso y’abana baturutse mu miryango 19 igize Coalition Umwana ku Isonga n’abakozi bayo

Yanditswe na Habarurema Djamali


Tanga igitecyerezo

Ibitekerezo


Tanga igitekerezo


Izindi nkuru

Inkuru zikunzwe